Dili(timorpost)—Sosiedade Sivíl (SS) ezije Ministériu Agrikultura Pekuáriu Peska no Floresta (MAPPF) apoiu ekipamentu hanesan tratór ba agrikultór sira hadi’a irrigasaun no natar sira ne’ebé aat no toos hodi hasae produsaun iha rai laran.
“Ita husu Ministériu Agrikultura Pekuáriu Peska no Floresta (MAPPF) tenke prepara fasilidade hodi apoiu tratór ba komunidade sira hodi hadi’a irrigasaun natar no toos sira hodi kuda hare no batar atu hasae ita nia produsaun iha rai laran”, Diretór Organizasaun Noun Governamentál (NGO), Luta Hamutuk, José Alves, informa ba Timor Post hafoin partisipa enkontru hamutuk ho BCTL iha Akait, Tersa (06/02).
Nia hatete, MAPPF nia ekipa tékniku tun iha terrenu hodi identifika area potensiál ne’ebé maka komunidade maioria kuda hare no batar atu nune’e bele apoiu ekipamentu sira ne’e ba.
Hodi nune’e ba futuru bele redús foos importasaun iha rai laran, tanba Timor-Leste ne’e buat hotu depende de’it sasán importasaun hosi rai li’ur, tanba governu seidauk iha polítika no jestaun ne’ebé di’ak hodi motiva no enkoraja komunidade sira atu halo toos no natar.
Aleinde ne’e mós, governu tenke oferese fini batar no hare, fore mungu no koto ba komunidade agrikultura iha territóriu laran tomak atu kuda ba toos no natar sira atu nune’e isin di’ak komunidade kolleita ba fa’an iha merkadu hodi hetan osan sustenta ba nesesidade família nian.
Antes ne’e mós, Diretór Jerál MAPPF, Martinho Laurentino Soares informa, sira nia ekipa daudaun ne’e tun iha terrenu hodi halo levantamentu no identifika irrigasaun ne’ebé hetan estragu barak liu iha munisípiu ne’ebé.
“Ami nia ekipa tékniku tun ona ba iha terrenu hodi identifika munisipiu ne’ebé maka irrigasaun no natar hetan estragu barak liu hodi apoiu ekipamentu tratór ba komunidade ne’ebé presiza hodi halo natar no kuda batar”, nia tenik.
Tanba MAPPF nafatin tau osan sosa tratór foun hamutuk unidade 25 no mós halo manutensaun ba tratór unidade 200 resin hodi haruka ba munisípiu sira atu uza ba halo natar no toos.
3,231 total views, 3 views today
Bele hare Video Seluk :
Subscribe to Timorpost
