Baukau(timorpost)—Durante fulan Janeiru ne’e Diresaun Transporte Terrestre (DTT) Munisípiu Baukau hatama reseita ba kofre estadu 23.057.50 USD.
“Orsamentu ne’ebé mensiona iha leten DTT Baukau rekolla liuhosi, parte inspesaun nian iha ema na’in-108 ho osan 14.640 USD, ba lisensa transporte públiku iha ema 134 ho osan 3.035 USD, ba Karta Kondusaun iha ema 157 ho osan.3.140 USD ba rejistu iha ema 202 ho osan 2,242.50 USD, total hamutuk 23.057.50 USD”, Diretór Diresaun Transporte Terrestre Munisípiu Baukau, Roberto da Cruz, hatete ba Timor Post iha ninia servisu fatin, Tersa (06/02).
Nia afirma, maski Diresaun Transporte Terrestre Baukau hatama reseita boot ba kofre estadu, maibé daudaun ne’e enfrenta difikuldade kona-ba ekipamentu servisu hanesan printer, komputadór no transporte hodi halo servisu.
Nia haktuir, ekipamentu hirak ne’e mensiona iha leten importante tebes atu hetan atensaun hosi Ministériu, tanba Diresaun transporte Terrestre Baukau atende dokumentu transporte nian ba munisípiu haat, Baukau, Lautem, Manatutu no Vikeke.
“Hanesan Diretór ha’u la nonook, maibé halo ona proposta hodi hato’o ba ami nia nai ulun sira iha nasionál hodi haree ba problema ida ne’e”, nia lembra.
Atuál Diretór DTT ne’e hatutan mós katak, kona-ba rekursu umanu daudaun ne’e sufisiente, maibé ba oin sei presiza tan tékniku na’in neen liuliu tékniku treinadór ba karta kondisaun nian, tanba agora daudaun rekursu umanu la iha.
“Ha’u nafatin esforsu liga ba Diresaun Nasionál atu nune’e kondutór karreta nian bainhira ezame hotu kona-ba karta kondusaun nian hotu lalika foto tan rekomendasaun mai hosi nasionál, maibé ezame eskrita ho oral iha de’it Baukau”, nia hakotu.
2,817 total views, 3 views today
Bele hare Video Seluk :
Subscribe to Timorpost
