Dili(timorpost.com)–Asosiasaun Jornalista Timor-Lorosa’e (AJTL) ho Oxfam iha Timor-Leste, hodi organiza Media Tour ba Jornalista na’in 14 hosi media nasionál sira hodi promove setór produtivu sira iha Munisípiu Ermera, haree liuliu ba Setór Agrikultura, Turizmu, Joven kriativu, Feto Potensiál, program Seasonal Works iha Australia, Joven ho Defisiénsia no LGBT sira.
Presidente Asosiasaun Jornalista Timor Lorosa’e (AJTL), Zevonia Vieira, informa katak AJTL servisu hamutuk Oxfam iha Timor-Leste, kontinua halo Media Tour ba Jornalista sira hodi ba iha Munisípiu Ermera hodi foti istória kona-ba joven sira nian ne’ebé maka kontribui liuhosi setór produtivu sira. Setór produtivu sira maka hanesan, Agrikultura, Turizmu, no mós oinsá maka promove joven sira ne’ebé hala’o servisu iha program Seasonal Works iha Australia.
“Ho ne’e AJTL kontinua fó espasu ba ita nian membru AJTL sira hodi ba halo kobertura iha area rural sira ho nune’e bele hetan informasaun sira ne’ebé presiza, Estadu ho Governu sira haree no tau atensaun”, Dehan Presidente AJTL Zevonia Vieira, liuhusi konferénsia Imprensa iha Edifísiu Oxfam Hudi Laran, Kinta (18/04).
Nune’e mós Reprezentante Country Director Oxfam iha Timor-Leste, Adilson Junior mós hateten, AJTL kontinua iha nian kometimentu hodi servisu hamutuk ho Oxfam iha Timor-Leste, hodi hala’o Media Tour. Oxfam ho AJTL la’ós foin halo Media Tour, Media Tour ida ne’e halo iha tinan ida liu ba ona, hodi kontinua halo kobertura ba joven sira ne’ebé kriativu iha Munisípiu sira liuliu Munisípiu Ermera.
Nia haktuir programa Media Tour ida ne’e hetan finansia hosi DFAT, liuhosi projetu prosivu. Ho Objetivu atu lori Jornalista sira ba iha Munisípiu Ermera, hodi halo kobertura kona-ba joven sira nia kriatividade, liga ho sira nia investimentu iha setór Agrikultura. Alende ne’e, iha mós joven sira ne’ebé maka hetan oportunidade ba iha programa Seasonal Works, halo mós kobertura ba sira nian susesu, no saida maka sira aprende kona-ba iha Programa Seasonal Works ne’e rasik no saida maka sira kontribui iha sira nian hela fatin no iha komunidade.
Nia salienta, entaun ida ne’e importante tebes atu kontinua halo investigasaun ne’ebé kle’an no bele informa ba polítiku na’in sira, liuliu ba governu sira ne’ebé maka foti desizaun hodi bele haree kona-ba poténsia hirak ne’ebé joven sira iha area rural iha Munisípiu Ermera. No mós saida maka Governu nia planu atu kontribui para investe hodi hadi’a no dezenvolve di’ak liu tan sira ninia investimentu ne’ebé maka durante ne’e sira halo iha area rural.
“Molok Media Tour ida ne’e ita organiza. ita halo uluk Workshop iha loron rua no lori ema sira husi SEFOPE mai esplika kona-ba informasaun sira ne’ebé maka liga ho empregu esterna, joven hira maka envolve iha empregu ida ne’e. Alende ne’e ita mós konvida sosiedade sivíl hanesan La’o Hamutuk atu fahe informasaun sira liga ho Orsamentu Jerál Estadu nian ne’ebé maka halo ba iha setór Agrikultura no setór produtivu sira seluk”, nia akresenta.
Reprezentante Country Director, informasaun hirak ne’e sai hanesan bukae ida ba kolega Jornalista sira hotu-hotu, molok sira tun ba iha kampu hodi halo kobertura, atu bele hakle’an liu tan no konfirma saida maka akontese iha Munisípiu Ermera.
Iha kobertura ida ne’e Maluk jornalista sira sei ba foti informasaun husi joven sira, grupu feto no inklui ema ho defisiénsia sira, nune’e mós autoridade lokál sira atu bele konfirma mós informasaun sira ne’e maka jornalista sira foti ne’e bele iha balansu. Nune’e mós informasaun hirak ne’e bele tulun mós polítiku na’in sira, hodi kontinua sira ninia investimentu no prioridade sira iha setór Agrikultura no iha setór sira seluk. hodi bele diversifika ita nia ekonomia iha ita nian nasaun
“Ha’u hanoin ida ne’e maka objetivu no servisu kooperasaun ita halo entre Oxfam ho AJTL no ita hein katak Media Tour ne’ebé maka sei hala’o iha Ermera loron Tolu ne’e sei la’o ho susesu. No kolega jornalista sira bele hetan informasaun sira ho di’ak no ita bele kontinua halo advokasia iha nivel Munisípiu no mós nivel nasionál”, nia tenik.
Alende ne’e, husi rezultadu Media Tour ne’e maka AJTL sei produs istória susesu joven sira nian, inklui Feto potensiál no ema ho defisiénsia, Grupu joven kriativu sira seluk. No istória susesu ida ne’e sei halo ba produsaun ba bulletin Media Tour nian. No Media Tour ida ne’e sei halo lansamentu hodi konvida Ministériu sira ne’ebé relevante atu halo diskusaun kona-ba saida maka jornalista sira hetan iha kampu durante hala’o Media Tour.
Media Tour ne’e hetan apoiu fundus husi DFAT ka Governu Australia, liuhosi projetu HAKFOUN no kolabora ho Oxfam iha Timor-Leste.
2,262 total views, 3 views today
Bele hare Video Seluk :
Subscribe to Timorpost
