KOVALIMA, (timorpost.com)— Komunidade iha suku Belekasak, postu administrativu Suai, munisípiu Kovalima to’o ohin loron kontinua halerik ba bee-moos no estrada ne’ebé tinan barak ona defikulta komunidade sira.
“Ami-nia preokupasaun mak, ami komunidade to’o ohin loron la asesu estrada, programa Governu anteriór momentu ne’e ita konstrui ona maibé politikamente Governu anteriór momentu ne’eba hapara tiha servisu, entaun agora ita la asesu estrada, ligasaun postu Maukatar ho aldeia 7 hanesan aldeia Ilha, Dais, Gozolu, Lolowa, Gusadao, Du’ut, inklui aldeia Loloba, ne’ebé iha suku Belekasak”, xefe suku Belekasak, Leonito Gusmão, informa ba Timor Post iha Kovalima, Sesta, (09/02).
Nia hatutan, “Parte ida mós kona-ba bee-moos mais ou menus 75% asesu ona bee-moos maibé hela aldeia ilha mak seidauk asesu, uluk asesu ona bee maibé tanba udan foin lalais ne’e entaun estraga hotu instalasaun bee, entaun afetadu ba bee-moos tanba afeta ba aldeia ilha mak la asesu, aldeia 6 mak mais ou menus asesu ona bee”.
Xefe suku ne’e hatete, rekomendasaun no proposta parte autoridade lokál sempre halo ba Governu anteriór sira no iha mandatu Governu Konstitusionál da-IX nian komunidade sei halo hodi hato’o ba Governu, no Ministru rasik foti ona alternativu katak tinan ne’e sira loke duni no konstrui estrada ne’ebé ligasaun aldeia 7 no moos liga ba postu Maukatar nian.
Aliende ne’e, kona-ba eletrisidade ba aldeia 7 iha suku Belekasak, hela aldeia Gasolu mak seidauk asesu tanba ne’e autoridade lokál sei halo esforsu oinsá mak komunidade iha aldeia Gasolu mós bele asesu ba eletrisidade hanesan aldeia seluk.
Entretantu suku Belekasak iha aldeia 7, uma-kain 800 resin ho populasaun hamutuk 3000 resin.(*)
3,054 total views, 3 views today
Bele hare Video Seluk :
Subscribe to Timorpost
