Dili (timorpost.com) – Uma-kain rihun rua nulu-resin-ualu atus lima ualu nulun resin tolu (28.583), iha Timor laran tomak, la simu subsídiu fim do ano 200 USD.
Koordenadór Jerál, Sekretariadu Tékniku Pagamentu Subsídiu, Ministériu Solidariedade Sosiál no Inkluzaun (MSSI), João Coimbra, hatete hafoin halo pagamentu iha dia 6 Janeiru, tékniku sira rekonsilia kedas dadus benefisiáriu uma-kain total 311,371 maka hetan ona direitu subsídiu ho valor osan 62.274.200 USD, maibé uma-kain 28,583 maka la simu sira-nia direitu subsídiu ho valor kuaze millaun 5.2 USD, ne’ebé tenke re-depózitu ba kofre estadu.
“Dadus ne’ebé daudauk ne’e ami rekonsilia hela hetan ona provizóriu 311,371 uma-kain hetan ona direitu, ne’e korresponde ba osan 62.274,200 USD, ne’e mak ita selu ona ba uma-kain sira. Purtantu husi ne’ebá ita sei iha 28.583 uma-kain mak la hetan direitu, entaun Sekretáriadu mós provizóriu rejista millaun 5.2 USD, sei haree re-depózitu ba kaixa jerál estadu”, nia informa, hafoin partisipa pose fiskál únika INDDICA no INCSIDA, iha salaun enkontru MSSI Kaikoli, Kinta (12/01).
Nia dehan, tuir lista uma-kain aprovadu sai benefisiáriu subsídiu 200 USD iha territóriu Timor laran tomak total 379,954, ne’ebé ho orsamentu alokadu 67.990.800 USD. Maibé pagamentu la’o husi Dezembru to’o dia 6 Janeiru termina deteta uma-kain sira ne’e balu seidauk simu.
“Kona-ba númeru benefisiáriu, hanesan inisiu ha’u dehan total benefisiáriu ne’ebé ami rejista ne’e hamutuk 379,954 uma-kain, korresponde ba osan karik 67.990.800 USD”, nia hateten.
Nia afirma, Uma-kain 28.583 la hetan direitu ba subsídiu ne’e, tanba sira konxiente hatene laiha dalan atu simu, entaun hodi halo auto resesaun, balu naran rejista mais lakon ona sira-nia vida, balu servisu iha rai li’ur, balu la ba sentru pagamentu, entaun automatikamente la hetan direitu, nune’e orsamentu ne’ebé tuir loloos selu ba sira tenke fila fali ba kofre estadu.
Pagamentu iha munisípiu sira taka iha dia 22 Dezembru, eseptu iha Oe-kusi tanba levantamentu nee halo iha dia 20, tanba loron boot Natal, 26 hahú fila fali to’o dia 30 Dezembru tama tinan foun to’o fali dia 3 Janeiru maka sira hahú fali pagamentu no sira taka iha dia 6 Janeiru.
Enkuantu bainhira konfirma kona-ba lista reklamante, tuir Koordenadór Jerál STPS, katak maski númeru reklamante ne’e iha maibé labele fó sai ba públiku, ne’e kompeténsia Ministru ka nivel polítiku sira mak bele fó sai.
Tanba ne’e bainhira Timor Post tenta lista reklamante sira ne’e ba Ministériu Administrasaun Estatál, maibé pesoál balu informa, Ministru laiha fatin.
2,609 total views, 6 views today
Bele hare Video Seluk :
Subscribe to Timorpost
