DILI-Organizasaun Movimentu Foin Sa’e Feto (MOFFE) husu ba Sekretáriu Estadu Igualdade no Inkluzaun (SEII) atu apoiu fundu ba organizasaun feto iha Timor-Leste hodi fasilita formasaun ba feto potensiál iha nivel nasionál to’o lokál.
Kestaun ne’e hato’o hosi diretora organizasaun MOFFE, Yasinta Lujinha, relasiona ho komemorasaun loron internasionál feto ne’ebé mak komemora iha loron 8 fulan Marsu iha tinan ida ne’e.
“Ita komemora loron internasionál ba feto hotu iha Timor-leste tanba ne’e ami husu ba governu liuhusi SEII apoiu fundu ruma ba grupu feto sira hodi fasilita formasaun ba feto potensiál sira hodi hasae no kapasita sira nia koñesimentu kle’an hodi foti desizaun hodi envolve iha vida polítika”, informa diretora organizasaun grupu MOFFE Yajinta Lujinha ba, Timor Post iha nia servisu fatin Kaikoli, Tersa (07/03).
Diretora ne’e esplika, ho apoiu fundu ida ne’e ho objetivu atu apoiu sira nia programa estrutura hodi hakbiit feto potensiál iha nivel munisípiu to’o area rural hodi tulun no haforsa sira nia atividade asosiasaun feto munisípiu nian.
Nia dehan, feto potensiál barak maibé seidauk brani foti desizaun hodi kandidata sira nia an ba iha xefe suku, xefe aldeia, administradora ka prezidente tanba menus formasaun no menus koñesimentu entaun susar atu foti desizaun.
Tanba ne’e maka agora tempu to’o presiza kapasita feto potensiál liu husi formasaun no liu husi fundu ruma hodi apoiu sira nia grupu hodi loke negósiu ki’ik ruma hodi sira nia grupu hodi bele sustenta ba vida família nian.
Portantu tuir diretora ne’e katak, loron importante ida ne’e presiza governu halo reflesaun hodi fó omenajen hodi valoriza feto sira ne’ebé luta iha tempu pasadu fó sira nia an hodi luta ba rai ida ne’e maibé ohin loron sira laiha ona iha mundu ida ne’e.
Tanba ne’e maka liu husi komemora loron internasionál ba feto ne’e orgullu tanba governu tau ona iha kalendáriu maibé presiza governu liu husi SEII presiza kapasita formasaun ba feto potensiál sira hodi hasae koñesimentu kle’an hodi foti desizaun.
Portantu tuir feto potensiál ne’e katak, tinan ida ne’e tinan polítika eleisaun parlamentár no eleisaun munisipál, eleisaun xefe suku ho tema feto prontu lidera entaun presiza SEII servisu makas hodi kapasita formasaun ba feto potensiál iha partidu ida-idak hodi foti desizaun hodi kandidata sira nia an.
Aleinde ne’e nia husu, ba SEII atu servisu hamutuk ho organizasaun ne’ebé servisu kona ba feto nian hanesan Caucus, MOFFE, Rede Feto, no organizasaun sira seluk hodi prepara feto maluk sira hodi partisipa ativu hodi lidera iha instituisaun ruma.
Nia rekoñese durante governu liu-husi Sekretáriu Estadu Igualdade Inkluzaun (SEII) iha ona vontade hodi hari grupu Mulher ba feto nian iha ona mudansa tebes iha tinan hirak mai ne’e komesa suporta ona feto potensiál hodi hari grupu feto potensiál sira iha.
Hodi halibur feto potensiál sira iha nivel nasionál to’o iha nivel munisípiu hodi empodera, suporta no hakbiit feto potensiál sira hodi partisipa iha prosesu dezenvolvimentu.
1,304 total views, 3 views today
Bele hare Video Seluk :
Subscribe to Timorpost
