DILI ( Timor Post) – Negosiante iha merkadu Tabesi Taka tomak fatin terminál hodi fan sasán hanesan roupa, modo, no ai-funan.
“Ami hanesan kondutór, fatin estasionamentu hodi para ami-nia karreta, maibé negosiante sira uza fali fatin ne’e hodi fan sasan,” dehan motorista Alvaro Aleixo Amaral ba Online Timor Post, iha Terminál Tabesi, Domingu (14/08).
Nia dehan, negosiante sira ne’e Governu prepara ona fatin iha merkadu laran, maibé sira la uza fatin ida ne’e hodi halo negosiu.
“Iha loron segunda to’o sesta ne’e la mosu engrafamentu, maibé aat liu iha loron Sábadu ho Domingu, mosu engrafamentu tanba fatin estasionamentu ne’e hodi faan hotu sasán”, nia hateten.
Nia dehan, iha ne’e seguransa no iha xefe, maibé sira la halo kontrola ba negosiante sira, nune’e mós Sábadu ho Domingu sira la mai.
“Ami para karreta iha ne’e mós ami selu, maibé seguransa ho xefe sira, la haree ba ida ne’e, tanba dala-ruma ami sai la di’ak, entaun dala-ruma ami la para iha fatin refere parte PNTL hetan ami mós ami sala nafatin,” nia hakotu.
Iha fatin hanesan, motorista Carlos da Silva, hatete sira hanesan kondutór halai karreta, fatin ida ne’e parte Governu halo hodi karreta para iha ne’e, maibé agora fatin ema halo tiha maibé negosiante sira mak uza hodi faan sasán.
“Tanba ne’e, dala-ruma mosu engrafamentu ruma, sira negosiante sira dehan ami la di’ak, maibé fatin ida ne’e fatin estionamentu, ami atu para karreta,” nia dehan.
Motorista ne’e dehan, iha merkadu taibesi ne’e dehan tau seguransa, maibé tuir sira-nia haree, la mai halo kontrolu ba buat sira ne’e.
“Dala-barak ami kestiona buat sira, maibé ami komdutór sempre sala nafatin, dala-ruma ami soke negosiante sira-nia sasán mós ami mak sala nafatin,” nia konta.
Nia dehan, kuandu parte Polisia ka Walikota mai duni sira mós, mais negosiante sira kontinua fan iha ne’e.
“Tanba ne’e, ami husu ba Ministériu relavante se bele loron ruma tun mai haree, merkadu taibesi nia kondisaun oinsá atu haree ba asuntu sira hanesan ne’e” nia hakotu.
Liga ho situasaun ne’e, jornalista Sira tenta halo konfirmasaun ho parte Negosiante balun maibé lakohi fó komentáriu.
1,804 total views, 3 views today
Bele hare Video Seluk :