Dili (Timor Post) — Ministra Negósiu Estranjeiru Austrália, Penny Wong, ohin hasoru malu ho Ministru Agrikultura no Peska (MAP) Pedro dos Reis, halo diskusaun ba servisu tékniku agrikultura nian.
Ministru Agrikultura no Peska (MAP) Pedro dos Reis, hatete sira hetan vizita husi Ministra Negósiu Estranjeiru Australia nian tanba maioria populasaun Timor-Leste porsentu 75, mak moris ho agrikultura, entaun sira interese tebe-tebes hodi tulun MAP, atu bele hadi’a kualidade agrikultura rai laran.
“Ohin loron priviléjiu boot ba ami Ministériu Agrikultura Peskas (MAP), tanba Ministra Negósiu Estranjeiru Australia mai hala’o vizita, ida ne’e sira mai hodi haree atu bele tulun ita, hodi hasa’e kualidade agrikultura rai laran”, nia dehan iha resintu MAP Komoro, Kinta (01/09).
Ministériu iha relasaun servisu ho parseiru dezenvolvimentu sira, ne’ebé agora hanesan hala’o hela servisu iha ne’e no mós programa sira seluk.
“Espera ho vizita ohin, ba futuru dala-ruma sei arranja tempu para oinsá atu halo diskusaun ba servisu tékniku agrikultura nian”, nia hateten.
Portantu Ministra Negósiu Estranjeiru Australia husik hela traballu hodi servisu hamutuk nafatin ho parseiru dezenvolvimentu sira ne’ebé suporta husi Governu Australia, agora sira tenke hametin liu tan depois haree planu ba futuru oinsá mak bele hadi’ak liu tan, atu nune’e bele susesu di’ak ba povu Timor-Leste.
Iha fatin hanesan Ministra Negósiu Estranjeiru Australia, Penny Yong dehan Ministériu ida ne’e iha knaar importante atu tau matan ba toos na’in ka agrikultór sira iha Timor-Leste, ida ne’e importante tebes MAP hodi hala’o knaar ba iha povu Timor.
“Ita-nia servisu importante tebes ba seguransa ai-han, maibé la’ós husi Ai-han de’it maibé husi parte ekonomia ne’e atu hasa’e kualidade ba ita-nia povu nia moris,” nia hateten.
Nia dehan, mai iha ne’e hanesan reprezentante ba eventu foun husi Australia mak mai hala’o vizita iha Timor-Leste, parte ida ne’e mós importante hodi servisu hamutuk, oinsá atu hasa’e setór iha peska no agrikultura iha tempu oin mai.
“Ha’u kontente tebes tanba sentru peskiza internasionál ASEAN nian apoiu mós povu Timor atu hala’o peskiza hodi hasa’e seguransa Ai-han nian, au-mezmu tempu ami nafatin kontente servisu hamutuk ho Timor-Leste,” nia katak.
Iha vizita ne’e Ministra Negósiu Estranjeiru Australia, Penny Yong, hala’o vizita mós ba Produtu lokál Nutritivu Gostu husi grupu feto Baukau, batar, koto no seluk tan.
2,484 total views, 3 views today
Bele hare Video Seluk :
Subscribe to Timorpost
