DILI (timorpost.com) – Primeiru Ministru (PM), Taur Matan Ruak, la konkorda ho proposta husi deputadu no deputada sira iha Parlamentu Nasionál (PN), atu ko’a sai tiha osan millaun ida ba Prezidente Repúblika (PR), José Ramos Horta, husi Orsamentu Jerál Estadu (OJE), 2023.
“Ha’u agradese ba proposta husi Deputadu no Deputada sira nian, maibé Governu hanoin Prezidente Repúblika nia osan ita labele hasai, tanba ida ne’e Primeiru orsamentu ba Prezidente Repúblika ninia mandatu, tanba agora nia jere de’it osan tinan kotuk,” dehan Xefe Governu, iha Parlamentu Nasionál, hafoin debate OJE 2023, ba orsamentu Prezidente Repúblika, Sesta (11/12).
Nia dehan, razaun nia parte lakohi hasai osan ba Prezidente Repúblika, tanba iha tinan oin Governu no Parlamentu nia mandatu hotu ona no tun ona, hela de’it Prezidente Repúblika, mak sei mantein hodi haree ba servisu hotu-hotu liuliu ba estabilidade iha rai laran.
“Tanba ne’e mak ha’u hanoin OJE 2023, ba Prezidente Repúblika nian ita Governu labele ko’a, alias Governu sempre uza prinsípiu ida katak instituisaun rua ne’ebé ami nunka book nia osan mak ida Prezidente Repúblika no ida seluk Parlamentu Nasionál,” hateten nia.
Ho ida ne’e nia husu komprensaun ba deputadu no deputada sira, maibé sei iha ezersísiu seluk ne’ebé sei halo, orasida to’o iha Ministériu Edukasaun nia mak sei halo diskusaun kleru no halo esplikasaun.
Enkuantu Proposta tolu ne’ebé deputadu no deputada sira husi bankada FRETELIN hakarak atu hasai mak, hanesan Proposta númeru (11, 12 no 13) kona-ba fó bolsa estudu ba médiku sira atu ba hasai espesialista iha Kuba, nune’e mós ba profesór sira.
Husi proposta tolu ne’e deputadu no deputada sira hakarak hasai tiha osan ho montante millaun ida husi orsamentu Prezidente Repúblika nian, ne’e hodi aumenta ba Ministériu relevante, maibé Primeiru Ministru lakohi hodi labele hasai proposta tolu ne’ebé propoin hodi deputadu no deputada sira.
Ho nune’e Orsamentu ba Prezidente Repúblika ho montante 12.088.413 USD, pasa iha faze espesialidade iha Parlamentu Nasionál, liuhusi votasaun afavor (61), abstensaun (1) no kontra (0).
1,854 total views, 3 views today
