Arrepende ho Alkatiri, Xanana Husu Deskulpa

OE-KUSSE (timorpost.com) — Prezidente Partidu Kongresu Nasionál Rekonstrusaun Timorense (CNRT), Kay Rala Xanana Gusmão, husu deskulpa ba Povu Oe-kusse, tanba nomeia Sekretáriu Jerál Partidu FRETILIN, Mari Alkatiri, hodi lidera Zona Espesiál Ekonomia Sosiál Merkadu (ZEESM), durante tinan hitu, halo de’it dezenvolvimentu iha Oe-kusse Villa.

“Ha’u husu deskulpa ba povu Oe-kusse, tanba hanesan Lider Nasionál nomeia tiha Sekretáriu Jerál Partidu FRETILIN, Mari Alkatiri, ne’ebé iha esperiénsia tinan 24 iha rai li’ur, títulu boot ida “BOM GESTOR” ka jestór di’ak, ba projetu pilotu Zona Espesiál ba Ekonomia Sosiál no Merkadu (ZEESM) iha Rejiaun Administrativu Espesiál Oe-kusse Ambenu (RAEOA),” Xanana konta istória ne’e ba povu, durante eventu konsolidasaun no enkontru alargada ho estrutura partidu nian iha Oe-kusse, hodi halo preparasaun hasoru eleisaun parlamentár, ne’ebé hala’o iha sede CNRT, Numbei, Oe-kusse vila, Kinta (12/01).

SCROLL FILA BA NOTISIA

Lee Mós :

Komunidade Noeninen Kestiona Polítika ba Programa Food For Work

Nia dehan, tanba durante tinan hitu (7) halo de’it dezenvolvimentu infraestrutura estrada, no ponte iha de’it Oe-kusse vila, no projetu pilotu ne’e la fó benefísiu sosiál ba povu sira iha Oe-kusse Ambenu no Ataúru.

Tuir Xanana, bainhira ema ruma halo vizita ba Oe-kusse, haree de’it maka Oe-kusse vila, estrada kabeer, maibé fora hosi ne’e ba postu seluk, suku no aldeia, povu izoladu ba dezenvolvimentu.

Xanana konta, molok implementa projetu pilotu ZEESM iha rai-ketan Oe-kusse, nia rasik mak lori Alkatiri ba hala’o estudu komparativu ida iha Repúblika Popular China (RPC), hodi hasoru diretamente ho Prezidente Xi Jin Ping, iha tempu ne’ebá.

“Ha’u lori nia ba Xina dala-tolu kedas, hodi ba aprende kona-ba ZEESM, no ami-nia vizita durante semana ida, Prezidente Xi Jin Ping, mak responsabiliza hotu, tanba sira hakarak tebes atu ita bele aprende no implementa zona espesiál ne’e, maibé saida mak akontese durante ne’e, Mari haluhan totál tiha,” nia hateten.

Lee Mós :

Regra foun ba Funsionáriu Públiku Sira iha RAEOA

“Ita konfia nia tanba nia nu’udar doutór ida, no durante tinan 24 iha de’it rai-li’ur, ne’ebé ita hanoin katak nia sei iha kapasidade di’ak, hodi jere projetu ne’e, maibé realidade hatudu durante tinan hitu (7) mai kaer Oe-kusse, konsege halo de’it estrada iha suku haat nia laran, la’ós halo iha Oe-kusse tomak,” Xanana arrepende.

Xanana esplika, zona ekonomia espesiál iha mundu ne’e barak, maibé ida ne’ebé susesu no di’ak liu mak iha Xina, no ekonomia sosiál merkadu ne’e nia signifikadu katak, atu fó benefísiu direita ba povu Oe-kusse.

Lee Mós :

Inséndiu Karantina Tasi Tolu, Labarik no Inan Isin Rua Hetan Tulun

“Maibé ida ne’e ha’u-nia sala hotu, tanba ha’u mak husu nia mai iha ne’e. Durante iha ne’e povu barak mak ladún hetan benefísiu husi zona ekonomia sosiál ne’e”, nia preokupa.

Entretantu, Oe-kusse Ambenu kompostu husi postu haat mak Pante Makassar, Oe-Silo, Pásabe no Nítibe, no iha suku 18, maibé mandatu Alkatiri nian durante tinan 7, gasta tempu hodi dezenvolve de’it suku 4 iha postu administrativu ka sub-rejiaun Pante Makassar, no fatin sira seluk ninia kondisaun laiha mudansa dezde tempu koloniál Portugés, to’o ohin loron.

12,463 total views, 3 views today

Oinsa Ita nia Reaksaun iha Notisia Nee?