DILI- Prezidente Autoridade Nasional Komunikasaun (ANC- Sigla Portuges), Vidal dos Santos, hatete, daudaun ne’e liña internet Telemor la’o lentu tebes halo kliente barak maka preokupa.
“Daudauk públiku kestiona barak tanba liña Internet la’o lentu, presiza hadi’a kualidade,” nia dehan iha ámbitu partisipa inaugurasaun New Showroom Grand, iha Timor Plaza, Sesta (17/03).
Nia hatete, linha Internet Telemor la’o lentu dala ruma kauza hosi infraestrutura bázika liuliu oinsá atu lori Internet mai TL.
Tuir nia, Agora daudauk iha dalan 2 de’it, ida ho satélite microondas no infraestrutura, dalan 2 ne’e, se empreza hakarak leba Internet mai nasaun TL tenke investe satélite ho microondas barak.
“Ita espera katak ita nia Governu agora daudauk iha hela prosesu ba investimentu internasionál ne’ebé mak sei lori kabu sub marinho mai TL, liuhosi Austrália, ita espera katak prezensa kabu sub-marinho ne’e bele fó biban ba ita nia operadór sira atu fornese kualidade ho kustu Internet ne’ebé baratu iha TL,” nia hatete.
ANC mós agradese foin lalais partisipa iha lansamentu site foun ida iha Postu Administrativu Fatululik Munisípiu Covalima, iha ne’ebá area rurais ida laiha rede Internet entre operadór 3 ne’e, maibé Telemor bele monta ona site foun iha ne’ebá.
Hatán ba kestaun hirak ne’e Diretór Sentru Telemor Dili, João de Jesus Mota, hatete, kualidade Internet lentu tanba empreza sira sei uza de’it dalan 2, dalan ida mak oinsá satellite no microondas.
“Maibé ita espera katak, Governu sei bele solusiona fibra optical ka kabu sub-marinho, bainhira investimentu ne’e mai buat hotu bele la’o di’ak no presu Internet sei baratu no kualidade liña sei lais liu tan,” nia ko’alia.
Total kliente Telemor ne’ebé daudaun ne’e rejistadu hamutuk rihun atus hitu, kuaze Munisípiu 13 inklui RAEOA, asesu hotu ona rede Internet Telemor, maibé iha aldeia ida rua mak seidauk iha liña Internet.
723 total views, 6 views today
