Dili (timorpost.com)—Prezidente Repúblika, Jose Ramos Horta kontinua halo soru mutu daruak importante ho Prezidente Partidu CNRT no Partidu Demokrátiku (PD) no ezekutivu sira.
Iha soru mutu ne’e, estrutura husi partidu koligasaun rua ne’e sei diskute ho Prezidente Republika Jose Ramos Horta kona ba asuntu importante sira hanesan formasaun ba governu foun.
Prezidente Partidu CNRT, Kay Rala Xanana Gusmão hatete, iha loron 06 fulan Juni partidu rua ne’e mai ida-idak hodi hatán ba konvite prezidente Repúblika nian hala’o enkontru informal
“Enkontru ohin ita bele temi dehan semi-formal depois de Informal no sei tama ba faze formal. Ohin partidu rua ne’e mai hamutuk sai ida de’it hodi ko’alia ho Prezidente Repúblika kona ba kalendáriu preparativus formasaun governu da-sia nian” haktuir Kay Rala Xanana Gusmão, hafoin remata enkontru ho Prezidente Repúblika iha Palasiu Prezidensiál Ai tarak-Laran, Dili (09/06/2023).
Nia haktuir, partidu rua ne’e konkorda katak loron 22 Fulan Juni hala’o primeiru sesaun lejizlativu foun.
Prezidente Horta mós sei hala’o vizita diplomátika iha loron 20 fulan Juni ba nasaun Fransa no Alemaña, no sei fila mai Timor-Leste iha loron 28 fulan Juni ne’e.
“Iha Loron 29 Fulan Juni Prezidente Repúblika sei uolu Primeiru Ministru Indijitadu, mai Aprezenta An Hodi Entrega Estrutura Forma Governu Foun, Iha Loron 30 Fulan Juni Pose ba estrutura Governu Foun da-Sia Konstitusionál”. Haktuir Xanana.
Kalendáriu Preparativus Formasaun Governu da-Sia
Iha sekuénsia neen (6) importante:
Sekuénsia primeiru iha loron 22 Juni: Termina lejizlatura anterior. Abertura ba servisu Prezidente Parlamentu Nasionál (PPN) sesante ba parlamentu foun, Verifikasaun ba podér, Juramentu ba Deputadu Lejizlatura foun, aprezentasaun lista kandidatura Prezidente Parlamentu Nasionál Husi Proponents sira.
Iha Loron 23 fulan Juni, sei iha loron daruak plenária parlamentu nasionál nian, ne’ebé hala’o husi estrutura parlamentu eleitu ou foun.
Iha 26 Fulan Juni, sei iha plenária datoluk husi Parlamentu Foun hodi hili Prezidente Parlamentu foun no Vise Prezidente Parlamentu Nasionál Foun.
Iha 29 Fulan Juni, Prezidente Repúblika rasik, konvoka enkontru ho Primeiru Ministru indijitadu.
Iha loron 30 Fulan Juni, Prezidente Repúblika, sei hasai dekretu prezidensiál kona ba nomeiasaun Nono governu konstitusionál.
Iha loron 1 fulan Juni, Tomada pose ba Nono Governu konstitusionál iha resintu Palasiu Prezidensiál Nicolau Lobato iha Oras Tuku Haat Loraik.
621 total views, 3 views today
