DILI— Kontajen votu iha Rejiaun Administrativa Espesial Oekusi Ambeno (RAEOA) remata ona, rezultadu hatudu partidu Kongersu Nasional Rekonstrusaun Timorense (CNRT), manan ho votu 19.624 (44,78), enkuantu Fretilin iha pozisaun segundu lugar ho votu 15.382 (35,10%).
PDN 17 (0,04%), PLPA 379 (0,86%), PLP 1160(2,65%), PD 2625(5,99%), KHUNTO 1957(4,47%), PVT 271(0,62%), UDT 60(0,14%), PUDD 1775(4,05%), PR 66(0,15%), UNDERTIM 56(0,13%), FRETILIN 15382(35,10%), CNRT 19624(44,78%), CASDT 191(0,44%), MLPM 30(0,07%), PST 60(0,14%), PDC 32(0,07%), APMT 143(0,33%).
Ho rezultadu final apuramentu iha RAEOA, hatudu katak CNRT manan hikas FRETILIN ne’ebé maka iha eleisaun parlamentar tinan 2017 manan CNRT ho votus 14055 enkuantu CNRT 10490, tanba ne’e maski iha apuramentu ne’e Fretilin nia votu sa’e maibé laiha signifikativu.
Iha rezultadu apuramentu final iha RAEOA ne’e mos haree katak votu ba partidu PLP ne’ebé lidera hosi Taur Mata Ruak, tun. Antes ne’e iha Parlamentar 2017, PLP hetan votu final iha RAEOA hamutuk 2335 maibé agora iha eleisaun Parlamentar 2023, votu PLP tun ba 1160 (2,65%). Enkuantu PUDD ne’ebé iha eleisaun parlamentar 2017 ho de’it votu 1811 (5,1%) agora hakat liu tiha PLP ho votu 1775(4,05%).
Enkuantu partidu KHUNTO, ba eleisaun parlamentar tinan ida ne’e nia votu sa’e kompara ho eleisaun parlamentar iha tinan 2017. Iha eleisaun parlamentar 2017 KHUNTO nia votu 1271 (3,5%) maibé iha eleisaun ba tinan ida ne’e votu sa’e ba 1957 (4,47).
Maski rezultadu apuramentu munisipiu hatudu CNRT manan iha RAEOA, maibé rezultadu hosi apuramentu RAEOA nian sei lori mai iha CNE hodi prepara ba apuramentu nasional. Iha apuramentu nasional sei halo fila fali kontajen votu ba votu nulu, branku, rejeitadu no reklamasaun, tanba ne’e nia rezultadu sei bele iha mudansa.
3,649 total views, 3 views today
