(Reportajen Jose Mauno/Editor Mateus da Cruz)
BAUKAU— Misa domingu Ramus, ohin, iha Igreja Katedrál Baukau, partisipa mós hosi Lider karizmátiku Kay Rala Xanana Gusmão no kandidatu prezidensiál 2022 Jose Manuel Ramos Horta.
Ba Jornalista, kandidatu prezidente repúblika ho númeru sorteiu 1, ne’e hatete, selebrasaun Domingo Ramus importante tebes ba sarani katóliku tomak iha mundu espesialmente iha Timor Leste
“Ohin ha’u rasik, avó nana ho ekipa hotu ami hamutuk ho sarani sira partisipa iha Domingu Ramus”, nia hatete.
Tuir nia, selebrasaun Domingu Ramus importante tanba Timor-Leste kuaze 98% ema relijiaun katóliku, tanba ne’e tenke partisipa.
Entretantu, Administradór Diocese Baukau, Pe. Alípio Pinto Gusmão, iha nia omilia hatete, sarani hotu atu tenke kaer metin tuir São Paulo nian hanorin katak tenke jejún no haraik an to’o mate.
“Ita nia Na’i Jesus Kristu ema foti nia hanesan kristu liu rai maibé to’o ikus tenke terus to’o mate hodi Salva Ita nia salan,” dehan Pe. Alípio liu husi ninia omilia iha Igreja Katedrál Baukau, Domingu (10/4/2022).
Nia hatutan, Maromak iha Nia Vida Moris haraik aan, dedika nia Aan tomak atu serve ema hotu, maibé tanba mundu nee nakonu ho pekadu liu husi hahalok ema nian hanesan Oho malu, haterus malu tanba ne’e nia husik nia vida tomak, Ema tolok no tarata nia, maibé too ninia finalidade hetan Gloria ne’ebe forti liu tan tanba mate iha Cruz hodi Salva ema husi sala.
Tuir observasaun, Antes selebra misa, Pe. Alipio fó bensaun Ramus ne’ebe sarani sira kaer iha liman hodi kanta kántiku Hebreu sira nia liurai, nune’e Hahú hala’o prosisaun husi Eskola Primária Katóliku São. Domingos Xavio Baukau ho sarani sira, to’o Igreja Katedrál Baukau.(Lee notisia seluk iha Timor Post/Asesu You Tube Timor post)
1,072 total views, 3 views today
Bele hare Video Seluk :