BAUKAU (TIMORPOST.COM) – Autoridade Suku Samalari, Postu Administrativu Baukau Vila sujere atu uza orsamentu Programa Mão de Obra (PMO) Postu Administrativu, segunda faze tinan 2023, ba hadi’a kanu irrigasaun tradisionál Modo-Buti.
Sujestaun ne’e hato’o husi Xefe Suku Samalari, Rui G. Magno Sequeira ba Timor Post via telefone, Segunda (02/09/2023).
“Programa Mão de Obra Postu Administrativu segunda faze ba Postu Administrative Baukau Vila mai Suku Samalari, Ha’u sei koloka ba iha hada bronjong (gabiões) iha Kanu irrigasaun tradisionál ne’ebé kada tinan mota sempre sobu estraga iha mota Samalari,” dehan Rui.
Nia esplika, razaun importante husi suku Samalari tau orsamentu ne’e ba hadi’a bronjong atu hatudu netik buat ruma ne’ebé komunidade no sosiedade bele sente ninia benefísiu tanba implementasaun PMO tempu hirak liubá hanesan hamoos estrada, valeta hirak ne’e ladún fó impaktu pozitivu.
Nia afirma, atividade limpeza iha estrada, valeta no taka estrada kuak iha nia vantajen maibé kuandu tempu udan, du’ut kontinua moris, bee mai solur moos tiha rai iha estrada halo estrada kuak nafatin maibé kuandu hada bronjong nia durasaun kleur.
“Intensaun ami nia atividade hada bronjong husi orsamentu PMO nian ne’e oinsá ita husik hela liman fatin (mão de obra) ruma iha ne’ebá ho objetivu atu hetan bee la’o normal ba natar, nune’e bainhira mota tun volume estragu uitoan. Tanba nee PMO mai suku ida ne’e, ami iha ona hanoin, duke hamoos estrada no baleta, di’ak liu uza ba hada bronjong 200 metru hodi satan be tun estragu ba kanu irrigasaun,” dehan Rui.
Nia haktuir, tempu servisu la’o tuir nafatin mata dalan ne’ebé iha, normalmente $5 ba kada traballadór, xefe ekipa $7 kada loron, durasaun tempu durante loron 10, kada loron servisu oras 8 no total traballadór hamutuk 40, enkuantu montante orsamentu ne’ebé destina ba Suku Samalari seidauk hatene tanba tuir informasaun Postu Administrativu Baukau Vila sei lansa iha 10 Outubru ne’e.
“Total orsamentu mai ha’u nia suku seidauk hatene tanba tuir informasaun programa nee sei hahú iha loron 10 fulan Ida ne’e. Regra servisu sei Nafatin hanesan pmo ne’ebé implementa liu tiha ona ba tempu servisu durante loron 10, traballadór na’in-40 kada traballadór sei simu osan $5 kada loron, xefe ekipa mak simu $7 kada loron,” nia lembra.
Nia argumenta intensaun husi atividade hada bronjong uza orsamentu PMO nian atu husik lembransa fíziku ruma iha sosiedade nia leet. Nune’e moos hada bronjong nee nia objetivu atu satan bee la’o normal ba natar komunidade nian no bainhira korrente mota tun volume estragu sei uitoan. Tanba dala barak akontese, agrikultór sira esforsu-an, halai natar maibé ninia rezultadu la dun másimu, bainhira udan boot ona kanu irrigasaun sempre naksobu.
Tuir informasaun irrigasaun Modo-Buti fornese bee ba Natar hamutuk 5.500 hectare.(#)
3,111 total views, 3 views today
Bele hare Video Seluk :
Subscribe to Timorpost
