(Reportajen Hermenegildo da Costa Tilman/Editor Mateus da Cruz)
Dili (Timor-Post)—Ohin loron Igreja Katólika Universal hamutuk selebra Domingu Ramus, hodi hanoin hikas mistériu Jesus Kristu tama ba sidade Jerusalem hodi haklaken nia gloria, hodi sakrifika an, terus, mate iha Krús ba salvasaun mundu nian.
Pe. Emanuel Lelo Talok, CMF, iha Omilia selebrasaun Misa Domingu Ramus, iha Igreja saun José Operáriu, Ai-Mutin, Domingu, (10/04), hatete, Domingu Ramus fó hanoin mai ita kona ba Jesus maski nia liurai, maibé, nia prontu sakrifika an tanba domin mai ita hotu.
“Domingu Ramus, povu sira halibur malu, nahe sira nia hena, ai-tahan oliveira sira, hakilar dehan hosanna ba ida ne’ebé mak mai hodi Na’i nia naran, Hosanna leten as ba, hodi simu Jesus liurai David nia oan ne’ebé tama ba iha sidade Jerusalem atu tama ba iha tempu Gloria nian hodi sakrifika nia an mate iha Krús tanba domin mai ita sira”, dehan Pe. Emanuel.
Nia hatete, Jesus sakrifika ona nia aan ba ita, tanba ne’e ita mós tenke sai hanesan Ramus tahan ne’ebé bele lori ksolok ba David nia oan sira ne’ebé mak moris iha terus no susar nia laran tanba ita nia hahalok sira.
“loloos ita mak tenke simu terus no kastigu sira ne’e, tanba ita nia salan sira, maibé tanba domin Jesus nian boot tebes mai mundu ida ne’e, nia prontu sakrifika nia an hodi salva ita hotu husi pekadu mundu nian,” dehan tan.
Nune’e, nia dehan, agora tama ona ba semana santa, sarani tomak sei selebra mistériu maksoin nian, mistériu terus, mate no moris hias sa’e ba lalehan.
Semana santa ne’e mak sei lori ita tama ba festa Páskua, katak sarani hotu hakmatek halo reflesaun ba an hodi prontu hamutuk hodi selebra festa ne’e ho di’ak hodi manan mistériu salvasaun dame mai mundu ne’e. (Lee Notisia seluk iha Jornal Timor Post/Asesu You Tube Timor Post)
1,065 total views, 3 views today
Bele hare Video Seluk :