Reporter Jaime Pires / Editór Marcos Fernandes
DILI (Timor Post)—Relasiona ho Jogu Kopa Euro entre Selesaun Nasionál Portugál hasoru Franca ne’e, Polísia Nasionál Timor-Leste (PNTL) orasida hahú halo chek point iha tuku haat loraik to’o aban madrugada.
“Sim ita halo ona ita nia preparasaun ba jogu Portugál hasoru França ne’ebé mak akontese iha aban madrugada, ne’ebé orasida hahú tuku haat loraik ne’e ita halo pasa revista to’o aban madrugada”, dehan Komandante Polísia Nasionál Munisípiu Dili, Superintendente Xefe Henrique da Costa, ba jornalista sira iha Salaun Ministériu Interior, Vila-Verde, kuarta (23/06)
Komandante hateten, atu nune’e evita apoiante hosi Portugál no França labele hamosu insidente no asidente inklui halo barullu iha kapitál Dili.
Nia subliña, ekipa ne’e orasida sei halo pasa revista iha fatin sanulu ne’ebé mak identifikadu ona no husu ba adeptu sira halo movimentu nafatin kumpre kódigu estrada ninia no respeitu mós ema seluk nia direitu.
“Labele uza motorizada kanu resin ba barullu iha fatin públiku no Bairru laran hodi halo ema seluk nia deskansa ladi’ak, liuliu ema oan nurak no moras sira deskansa mós ladi’ak, ita ba provoka no halo barullu”, tenik nia.
Nia mós husu ba adeptu sira iha Timor, presiza respeitu ema seluk nia símbolu sira hanesan Bandeira, tanba Bandeira ne’e iha ema nia nasaun ema respeitu, ema nia maibé iha timor tanba de’it fanátiku ba Jogadór balun uza sala ema nia símbolu hanesan Bandeira.
“Tanba ne’e PNTL sei halo atuasaun nafatin hanesan iha semana rua kotuk, konsege prende motorizada hamutuk (146), agora mós eskuadra polísia sira iha Munisípiu Dili nia ne’e sei aplika hotu ida ne’e”, nia alerta.
Nia deklara, maski sira halo esforsu iha semana kotuk insidente balun kontinua akontese, maibé agora sira kontinua haforsa liután iha pasa revista no sei halo patroliamentu tama sai Bairru hodi kontrola adeptu sira hosi ekipa rua ne’e.
Henrique mós subliña, sira mós husu ona apoiu husi polísia iha Komandu Jerál, no Unidade sira hanesan, (BOP), (UEP) no (UPF) hodi apoiu Komandu Munisípiu Dili atu halo patroliamentu ba jogu aban madrugada ne’e.
Enkuantu jogu Kopa Euro entre Portugál Hasoru Franca ne’e sei realiza iha loron aban kinta (24/06) tuku haat madrugada ne’e.(Lee Notísia Seluk Iha Jornál Diáriu Timor Post)
1,307 total views, 3 views today
Bele hare Video Seluk :
Subscribe to Timorpost
