Dili (timorpost.com)— Sentru Nasionál Formasaun Profisionál no Empregu (SNFP) Bekora, estabelese dezde tinan 2000 to’o ohin loron produs ona formandu hamutuk na’in-4507.
“Sentru ida ne’e ita estabelese dezde tinan 2000 to’o ohin loron ita produs ona formandu hamutuk na’in-4507 ba iha programa lubuk ne’ebé mak sentru ne’e estabelese”, dehan Diretór Ezekutivu Sentru Nasionál Formasaun Profisionál no Empregu (SNFP) Bekora, Fernando Araújo, ba Timor Post iha nia Knaar Fatin, Sesta (31/03/2023).
Nia dehan, programa sira mak hanesan konstrusaun sivíl no non-konstrusaun sivíl, konstrusaun sivíl ne’e iha lima mak hanesan karpintaria, soldadura, eletrisidade, kanalizasaun no pedreiru.
Non-konstrusaun sivíl mak hanesan mak hanesan tunu paun, halo dose no buat seluk tan, ida fali mak IT, informátika bázika, iha mós bengkel ba hadi’a motor ninian nune’e mós iha lian Korea ne’ebé mak agora daudauk halo hela hotu iha ne’e.
“Estudante sira ne’e mai hosi 14 munisípiu Inklui Ataúru no RAEOA, nia prosesu atu rejistu ne’e ita avizu liuhosi Jornál, televizaun no pájina SEFOPE nian, tanba ne’e mak joven sira hosi munisípiu sira mak mai rejistu iha tinan 2023 ne’e, estudante hamutuk na’in-305”, nia tenik.
Iha tinan 2023 ne’e Forsa Defeza sira hosi, kompañia Matima, Unidade Apoiu Metinaru ninian no mós Kuartél Jerál Fatuhada hamutuk na’in-18.
“Forsa sira ne’e mai depende ba nesesidade instituisaun ninian, tanba ita iha area 11 sira livre mente atu hili, maibé sira maioria hili mak AC, pedreiru no karpintaria, tanba ho objetivu ida katak depois sira remata formasaun iha ne’e, fila ba iha sira nia instituisaun halo servisu bazeia ba instituisaun ninian”, Diretór subliña.
Agora daudauk forsa ne’ebé mak mai tuir formasaun iha ne’e hamutuk na’in 18 no restante hosi ne’e joven feto no mane sira ne’e hamutuk mak 305 ne’e.
“Hahú hosi 200o to’o mai ohin loron sentru ne’e produs ona formandu hamutuk 4.507, tanba ita mós iha limitasaun fatin, tanba ne’e tinan-tinan ita simu estudante 300 to’o 400, maibé to’o klaran balu sai tanba hetan tiha ona servisu, balu ba fali universidade entaun menus”, nia subliña.
Sentru laiha dadus ida ne’ebé mak identifika formandu sira ne’ebé remata formasaun hetan ona servisu ne’e seidauk, maibé maioria ne’e balu servisu, hanesan sira ne’e mak iha skill ba AC no eletrisidade sira ba hadi’a ema nia ahi, sira mak kria rasik servisu ba sira nia-an.
Di’ak mak ne’e ministériu saúde nian pesoál hamutuk na’in-70 resin tuir formasaun kona-ba AC ninian, maibé di’ak sira remata formasaun sira fila ba konsege hadi’a sira nia AC sira ne’ebé aat iha munisípiu hodi asegura sira nia ai-moruk.
“Ida ne’e mak buat di’ak ida ita halo, ne’ebé maioria ne’e servisu ona, sira balu formasaun depois ba estájiu remata kompañia ne’ebé mak sira estajiu ba dada kedas sira hodi servisu iha kompañia ne’e”, nia informa.
Formadór sira kuaze timoroan sira hotu, ba lian Korea nian mak formador Koreanu na’in-rua, tanba sentru halo kooperasaun sira, sentru ida ne’e ba ketak la hamutuk ho formasaun lian Korea ninian, depois remat formasaun sira ba tuir teste iha SEFOPE no konsege balu liu ona ba servisu iha Korea.
2,237 total views, 3 views today
Bele hare Video Seluk :
Subscribe to Timorpost
