(Jornalista Cardenio Alves/Editor Estajiadu Hermenegildo Tilman)
DILI (Timor Post)- Tanba pesti Covid-19, maka estudante akademíka Universidade Nasional Timor Lorosa’e (UNTL) ba tinan 2021, foin mak hala’o orientasaun iha, Kinta, (20/01/2022) hodi kompleta regulamentu akademika nian.
“Orientasaun ida ne’e ami foin mak hahu iha tinan 2022. Tanba durante situasaun Covid-19, atividade hotu-hotu obrigatoriu tenke hapara. Nune’e orariu orientasaun muda fila fali mai fulan Janeiru tinan 2022 ne’e.”
Lia fuan hirak ne’e hateten hosi Vise Dekanu Asuntu Administrasaun no Finansas UNTL, Julio Aparicio ba Jornalista iha nia servisu fatin, UNTL Kaikoli, Kinta, (20/01/2022).
Nia esplika liutan, estudante sira ne’ebé tuir orientasaun akademiku ne’e, tinan akademiku 2021 nian. Tanba situasaun Covid-19 maka paradu tiha. No orientasaun tinan 2022, diferente ho tinan antes nian. Katak, antes ne’e hala’o to’o semana ida. Maibé, tinan ne’e hala’o durante loron tolu de’it.
Durante loron tolu katak Julio, estudante sira sei hetan esplikasaun kle’an konaba mundu akademiku UNTL nian. Inklui, vizaun no misaun universidade, nune’e sira bele entende ho diak regulamentu akademiku.
Esplikasaun hanesan hato’o hosi Dosente orientador orientasaun,Vitor Soares. Nia hateten, sei iha palestra hosi Polisia Nasionál Timor-Leste (PNTL) komunitáriu no tránzitu hodi esplika konaba regra tranzitu no kuidadu ambiente saudavel nu’udar ema intelektual iha sosiadade nia leet. Tenke hadook an hosi konflitu, ajuda kria paz no dame nomos jestaun kuida emosaun nu’udar ema humana.
“Maibé aprezentasaun palestra barak liu sei fó hosi Faculdade Ciéncias Sociais (FCS) hosi departementu hitu ne’ebé maka iha. Aprezentasaun ne’e sei fó biban ba estudante sira hodi koñese malu. No regra hirak ne’ebé maka tenke banati tuir,” katak Dosente permanente ne’e.
Hatan Timor Post konaba sistema rekrutamentu katak Dosente Vitor Soares, iha tinan 2019 to’o agora UNTL hein deit atu simu kista fakuldade no departementu nian. Kona-ba rezime tolu hanesan; jerál, espesial no oportunidade, laos kompetensia FCS nian.
Katak Dosente Vitor, tanba limitasaun fatin no fasilidade FCS nian maka simu estudante masimum 600 to’o 1.000. Tanba, rekruta estudante ho montante bo’ot, sei prejudika prosesu aprendijazen.
“Ba ministeriu relevante husu atu tau konsiderasaun ba problema iha FCS. Dezde tinan 2018 to’o agora tinan 2022 sempre hasoru problema fasilidade sira ne’ebé at no kumesa lahuk ba daudaun hodi desturbu ba fakuldade ne’e. Nune’e husu atu halo reabilitasaun,” sujere Dosente Vitor.(Lee notísia seluk iha jornál Timor Post/asesu You Tube Timor Post)
2,146 total views, 3 views today
Bele hare Video Seluk :
Subscribe to Timorpost
