DILI, (timorpost.com)— Ministériu Administrasaun Estatál (MAE) liuhosi Vise MAE, Jacinto Rigoberto Gomes de Deus, akompaña husi Prezidente Autoridade Munisipál Dili, Gregório da Cunha Saldanha, Diretór Jerál Desentralizasaun Governu Lokál, António Augusto Guterres, Diretor Jerál-DL, Virgilho da Costa, no mós Diretór Jerál-TOU, Maria Odete Barros Florindo, halo lansamentu ofisiál ba rekrutamentu Funsionáriu Servisu Administrativus Apoiu Suku 452, ne’ebé sei rekruta kada suku na’in-4 iha Timor-Leste.
Tuir informasaun ne’ebé Timor Post asesu ohin (18/03) iha pájina facebook Ministério Administração Estatal, katak Dekretu Lei númeru 81/2023 kria servisu administrasaun ida ba suku, hanesan servisus administrativus apoiu ba Xefe Suku, kompostu husi pozisaun haat (4), hanesan Sekretáriu Administrasaun Suku, Ofisiál Finansa Suku, Ofisiál Administrasaun Suku, no Ofisiál Asuntu Sosiál Suku.
Prosesu rekrutamentu ho selesaun sei hahú husi loron 19 Marsu 2024 to’o loron 1 Abril 2024 (10 dias uteis), no kandidatu ne’ebé hetan aprovasaun ikus sei dezempeña kna’ar importante iha ezekusaun, administrasaun ho monitorizasaun ba inisiativa sira ne’ebé hakarak avansa progresu sosiál ho ekonómiku iha komunidade sira-nia leet.
Vise MAE, hateten, Parlamentu Nasionál aprova tiha ona lei ida kona-ba funsionamentu suku sira iha fulan-Marsu tinan 2016, bazeia ba lei ida-ne’e, primeiru eleisaun suku ho durasaun tinan hitu (7) iha 2016, lei ida-ne’e sei nafatin hela, maibé depois haree ba esperénsia tinan-7 xefe suku anteriór sira hasoru difikuldade, maka Governu Konstitusional da-IX kria tan dekretu lei númeru 81/2023, 11 de Outubru, atu reforsa makina suku nian.
“Tamba ne’e mak ohin loron ita halo rekrutamentu, no baze ba dekretu lei ne’e mós ninia kompeténsia fó ba autoridade sira, maibé Ministériu Administrasaun Estatál observa no akompaña katak kbi’it suku sira seidauk sufisiente, no mós sira seidauk iha orsamentu própriu para atu halo rekrutamentu”, Vise MAE afirma.
Nia hatutan, orsamentu ba rekrutamentu funsionáriu servisu administrativus apoiu suku ne’e mai husi nasionál no koloka iha nível munisípiu, tanba suku sira ne’e teritóriu Ministériu Administrasaun Estatál nian, nune’e, Ministériu Administrasaun Estatál foti inisiativa atu fó apoiu ba Prezidente Autoridade sira, hodi aselera prosesu rekrutamentu ne’e, tanba xefe suku sira eleitu fulan neen (6) ona no laiha kondisaun sira.
Enkuantu, vaga ho 𝐏𝐨𝐳𝐢𝐬𝐚𝐮𝐧 𝐎𝐟𝐢𝐬𝐢𝐚𝐥 𝐀𝐝𝐦𝐢𝐧𝐢𝐬𝐭𝐫𝐚𝐬𝐚𝐮𝐧 𝐒𝐮𝐤𝐮, kategória pesoál servisu administrasaun suku, kria ho DL númeru 81/2023, 11 de Outubru, totál vaga ida, lokál servisu iha sede suku, saláriu mensál $150 kada fulan, modalidade kontratu termu sertu, durasaun fulan-8 (periodu probatóriu fulan-2) ho posibilidade bele estende bainhira iha avaliasaun pozitiva.
𝐏𝐨𝐳𝐢𝐬𝐚𝐮𝐧 𝐎𝐟𝐢𝐬𝐢𝐚𝐥 𝐅𝐢𝐧𝐚𝐧𝐬𝐚𝐬 𝐒𝐮𝐤𝐮, kategória pesoál servisu administrasaun suku, kria ho Dekretu Lei (DL) númeru 81/2023, 11 de Outubru, totál vaga ida, lokál servisu iha sede suku, saláriu mensál $150 kada fulan, modalidade kontratu termu sertu, durasaun fulan-8 (periodu probatóriu fulan-2) ho posibilidade bele estende bainhira iha avaliasaun pozitiva.
𝐏𝐨𝐳𝐢𝐬𝐚𝐮𝐧 𝐒𝐞𝐤𝐫𝐞𝐭𝐚́𝐫𝐢𝐮 𝐀𝐝𝐦𝐢𝐧𝐢𝐬𝐭𝐫𝐚𝐬𝐚𝐮𝐧 𝐒𝐮𝐤𝐮, kategória pesoál servisu administrasaun suku, kria ho DL númeru 81/2023, 11 de Outubru, totál vaga ida, saláriu mensál $ 170 kada fulan, modalidade kontratu termu sertu, durasaun fulan 8 (periodu probatóriu fulan-2) ho posibilidade bele estende bainhira iha avaliasaun pozitiva.
𝐏𝐨𝐳𝐢𝐬𝐚𝐮𝐧 𝐎𝐟𝐢𝐬𝐢𝐚𝐥 𝐛𝐚 𝐀𝐬𝐬𝐮𝐧𝐭𝐮 𝐒𝐨𝐬𝐢𝐚𝐢𝐬 𝐒𝐮𝐤𝐮, kategória pesoál servisu administrasaun suku, kria ho DL númeru 81/2023, 11 de Outubru, totál vaga ida, saláriu mensál $ 150 kada fulan, modalidade kontratu termu sertu, durasaun fulan 8 (periodu probatóriu fulan-2) ho posibilidade bele estende bainhira iha avaliasaun pozitiva.
Lansamentu ofisiál ne’e hala’o ohin iha salaun postu administrativu Metinaro, munisípiu Dili, hetan partisipasaun husi Diretór Jerál no Nasinál sira iha MAE, Inspetór Jerál MAE, Administradór Postu Administrativu Metinaro, reprezentante PAM Manatuto, no mós komunidade sira.(*)
3,915 total views, 9 views today
Bele hare Video Seluk :
Subscribe to Timorpost
