DILI (Timor Post)—Prezidente Bankada Partidu Demokrátiku (PD), Mariano Asanami Sabino, hatete Governu presiza toma atensaun ba katuas Australianu ida bain-bain tuur iha estrada ibun area Kolmera nian.
“Husu ba Governu no Estadu tenke atensaun ba katuas sidadaun Australianu ne’ebé loro-loron tuur iha dalan Kolmera, halo demonstrasaun, atu bele bolu nia hodi fó solusaun ruma ba nia, atu hapara nia demonstrasaun”, nia hateten hafoin Reuniaun Plenária iha PN, Tersa (12/07).
Tuir deputadu ne’e hatete, Governu Timor-Leste presiza buka dalan, hanesan orsamentu ka buka alternativa ba katuas ne’e.
“Demonstrasaun ne’ebé katuas ne’e halo hahú husi mandatu Prezidente Kay-Rala Xanana Gusmão, Jose Ramos Horta, Taur Matan Ruak, Francisco Guterres Lu’Olo, mai fali mandatu Ramos Horta, loro-loron mak tuur iha estrada ibun, iha area Kolmera nian, hodi hatudu nia lamentasaun husi surat tahan ne’ebé nia foti”, hateten deputadu Asanami.
Nia informa, katuas nia demonstrasaun ne’e loro-loron tuur de’it mak iha Kolmera, embaixada Australia nia oin, signifika problema ida ne’ebé sériu, tanba ne’e Estadu Timor-Leste presiza haree, hodi identifika nia problema.
“Tanba ita haree karik Timor-Leste nia emar barak maka halo demonstrasaun ita hakfodak, maibé ema ida de’it mak halo demo, tanba saida la fó valor”, nia dehan.
“Signifika hatudu ita nia traisaun ba eroi sira, tanba uluk nasaun TL nia independénsia ita mós hatudu demonstrasaun hodi hato’o mós ita nia opiniaun”, nia preokupa.
Nia dehan, uluk Governu bolu ona, maibé parese la rezolve nia problema, no problema saida los mak nia manifesta iha ne’e, tanba ne’e Governu tenke buka solusaun ba katuas ne’e, labele husik nia ezije problema to’o mate maibé sein solusaun ruma husi Estadu.
“Husu ba Prezidente Repúblika, nu’udar lutadór ba Direitu Umanu, ne’ebé nu’udar premiadu Nobel da Paz, no Primeiru Ministru, ne’ebé luta eroi ida ba nasaun Timor-Leste, husu ba ita atu rezolve katuas ne’e nia problema iha nasaun Timor-Leste”, nia subliña.
Tanba liuhusi nia demonstra ezije ba Governu, nune’e husu atu haree ba problema ne’ebé nia enfrenta, karik falla iha orsamentu ka família, tanba iha mandatu, Kay Rala Xanana Gusmão, Ramos Horta, Taur Matan Ruak, Lú Olo-nia hakerek hotu nia naran kompletu iha kuadru ne’ebé nia lori hodi demonstra ne’e.
Ne’e duni hanesan Deputadu, husu ba Estadu, atu fó Justisa ba katuas ne’e, nune’e husu mós ba Prezidente Parlamentu, halo inisiativa ruma, bolu nia, mai ko’alia ho nia, hodi bele rezolve nia problema.
3,388 total views, 9 views today
Bele hare Video Seluk :
Subscribe to Timorpost
