DILI, (timorpost.com) — Komandu Polísia Nasionál Timor-Leste (PNTL) munisípiu Dili liuhosi Komandante Seksaun Operasionál PNTL munisípiu Dili, Inspetór Xefe, José Luis Amaral, koordena ona ho responsável Grupu Povu Ki’ik atu aviza ba manifestante sira fila ona ba ida-idak nia hela fatin, tanba dokumentu protestu iha manifestasaun ne’e responsável entrega ona ba Priméiru Ministru (PM), Kay Rala Xanana Gusmão.
Nia hatutan, daudauk ne’e tempu udan ona, inan-aman sira kontinua hela lona okos iha fatin konsentrasaun Tasi-Tolu sei afeita ba sira-nia kondisaun saúde, aliende ne’e inan-aman sira-nia toos no natar bele abandona hotu, tanba ne’e haruka povu ki’ik sira ba ida-idak nia hela fatin.
“Ohin dader ne’e to’o lokraik sira bele fila ona ba ida-idak nia hela fatin, ha’u dehan hanesan ne’e sira-nia delegasaun Governu simu tiha ona, agora udan tuun mai kona katuas-ferik sira moras tanba hela iha lona okos, nusa la fila tiha, segunda, 4/12/2023 ne’e delegasaun mak ba hasoru de’it Priméiru Ministru hato’o sira-nia ezijénsia”, Komandante Seksaun Operasaun PNTL munisípiu Dili, Inspetór Xefe José Luis Amaral, informa ba jornalista iha fatin konsetrasaun Tasi-Tolu, Sábadu, (02/12/2023).
Nia hatutan “Governu simu maun sira ne’e, entaun semana oin mai ne’e reprezentante de’it na’in 10 hanesan ne’e maka lori relatóriu kazu rai Aimeti-Laran ne’e ba entrega Priméiru Ministru”.
Governu simu ona sira-nia prezensa no husu responsável de’it mak sei hato’o kronolojia kazu desputa rai iha Aimeti-Laran liuhosi relatóriu ne’ebé entrega direitamente ba Priméiru Ministru iha loron segunda, 4 fulan-Dezembru tinan 2023, tanba ne’e udan mós mai daudauk inan-aman sira bele fila para kontinu hala’o servisu toos no natar.
Reprezentante Grupu Povu Ki’ik, Jaime Soares da Costa, hatete, “Durante ami-nia asaun hetan seguransa di’ak husi polísia, ami agradese ba ida-ne’e, komandante mós ideia di’ak, ami sei haree para atu haruka inan-aman sira fila, depois responsável mak lori relatóriu kazu Aimeti-Laran ba entrega ba Priméiru Ministru, ne’e mós ideia di’ak”.
Tanba ne’e maka Grupu Povu Ki’ik aseita ona ideia Komandante Operasaun PNTL Dili nian atu haruka inan-aman sira fila ba sira-nia hela fatin, depois responsável mak sei reprezenta hato’o karta protestu ne’e ba entreha iha Gabinete Priméiru Ministru atu foti desizaun kona-ba kazu rai Aimetin-Laran.
Tuir observasaun Timor Post, iha ba fatin konsentrasaun Grupu Povu Ki’ik Tasi-tolu, iha oras tuku 8:00, baraka ida-idak kontinua dada, ema kontinua halo atividade konsetrasaun hodi hein rezultadu, maske iha Sesta-lokraik udan tuun hodi halo sira preokupa uitona ba sira nia kondisaun, maibé iha dader ne’e kedas ida-idak halo lipeza, aleinde ne’e atu antisipa udan monu rai, baraka ida-idak komesa kee bee-dalan atu fó kondisaun ba sira atu hela maske udan monu rai sira ladún preokupa ona, kotinua hein desizaun husi Governu.(*)
1,239 total views, 3 views today
Bele hare Video Seluk :
Subscribe to Timorpost
