OEKUSI (timorpost.com) – Sekretária Rejionál Asuntu Administrasaun, Martinho Abani Elu, hala’o sorumutu ho Vice Reitór UNTL, Hélio Xavier no Dekanu Fakuldade Siénsia Sosiais, Camilo X. Almeida, entrega estudante estaziadu hosi UNTL na’in-153 sei hala’o estájiu sosiál iha RAEOA durante fulan ida.
Martinho hatete nia parte agradese ba dirijenti Universidade Nasionál Timor Lorosa’e (UNTL) liuhosi Fakuldade Siénsia Sosiais, bele hili RAEOA koloka estudante 153 atu bele implementa teoria ne’ebé aprende durante iha banku estudu.
Nia dehan, RAEOA kompostu hosi suku 18, Autoridade RAEOA iha programa ida suku Amasat, nia objetivu atu lori dezenvolvimentu hakbesik liu ba povu mak setór Edukasaun, Saúde, Agrikultura, turizmu komunitária, Meiu Ambiente no Sosiál.
Tanba ne’e, estudante estaziadu sira bele hala’o servisu iha suku no aldeia sira ajusta ho programa refere.
Entretantu, Dekanu Fakuldade Siénsia Sosiais, Camilo X. Almeida, hatete, objetivu hosi sorumutu ne’e mak UNTL liuhosi Fakuldade Siénsia Sosiais informa Autoridade RAEOA reprezenta hosi Sekretaria Rejionál Asuntu Administrasaun atu entrega estudante estaziadu na’in-153 koloka hala’o servisu sosiál ba suku hitu ne’ebé UNTL identifika ona iha Sub-rejionál Pante Makassar hodi hala’o servisu sosiál durante fulan ida, atu implementa siénsia ne’ebé durante aprende iha banku estudu nian.
Tuir nia, estudante hirak ne’e kompostu hosi departamentu Administrasaun Públika no Relasaun Internasionál.
Nia dehan, suku hitu ne’ebé identifikadu mak hanesan Suku Costa, Nipani, Lifau, Cunha, Lalisuk, Naimeko no Bobokase. Durante estaziadu hala’o misaun iha RAEOA sei hetan akompañamentu hosi profesór orientadór sira.
Jerente UNTL ne’e mós agradese ba Autoridade RAEOA tanba kooperasaun di’ak ho UNTL hodi fasilita viatura atu tula estaziadu sira ba iha suku sira ne’ebé identifikadu.
2,103 total views, 3 views today
