OEKUSI-Autoridade Rejiaun Administrativa Espesiál Oé-Cusse Ambeno (RAEOA) liuhusi Sekretáriu Rejiaun Asuntu Agrikultura, distribui foos ba komunidade afetadu estrada nasionál hamutuk uma kain 59 iha aldeia Makelab, suku Taiboko, Sub-rejiaun Pante Makasar.
Reprezentante komunidade aldeia Makelab, Domingos Colo, hatete nia parte la satisfás ho apoiu ne’ebé mak Autoridade RAEOA distribui foos ba komunidade afetadu sira ba estrada nasionál ne’ebé hahú husi ponte Noe-Fefan ba to’o suku Suni-Ufe, Sub-rejiaun Nítibe.
“Primeira vés ha’u sente triste, ho apoiu ohin ami simu husi autoridade, tanba ha’u lakon ha’u nia rai ektare ida resin, sira mai fó de’it foos karon ida, maibé la buat ida, ha’u tenke fó ha’u nia rai atu halo dezenvolvimentu,” Domingos espresa ninia sentimentu ho triste iha aldeia Makelab-Oekusi, ne’ebé mak Timor Post asesu hosi Rádiu Komunidade Atoni Lifau, Sesta (17/03).
Entretantu, Sekretáriu Rejiaun Asuntu Agrikultura RAEOA, José Eta, hatete, Autoridade RAEOA distribui foos ba komunidade afetadu sira ba alargamentu estrada nasionál Pante Makasar ba to’o suku Suni-Ufe, Sub-rejiaun Nítibe.
“Estrada hahú husi ponte Noe-Fefan ba to’o Oe-nunu ne’ebé mak afeta ba ita nia komunidade sira nia to’os, natar, plantasaun, iha aldeia Makelab hamutuk uma kain 59,” José haktuir ba jornalista sira iha aldeia Makelab, Kinta (16/03).
Tanba ne’e, iha loron 30 fulan Janeiru 2023, Diresaun Terras no Propriedade halo ona diskusaun ho komunidade afetadu sira, ne’e mak iha loron Kinta (16/03) autoridade RAEOA lori foos hodi apoiu ba komunidade sira ne’e.
José Eta hatete nia parte agradese ba komunidade sira iha aldeia Makelab, suku Taiboko, tanba komunidade iha konxiénsia rasik hodi sobu lutu atu fó espasu ba kompañia hodi halo konstrusaun estrada.
“Ita haree daudaun komunidade balun muda ona sira nia lutu, maibé balun mak seidauk, entaun bazeia ba enkontru iha semana kotuk liubá ekipa husi terras hamutuk ho agrikultura levanta kedas dadus, ba estragus sira hanesan toos, ai-farina, lakeru, nu’u, has, ai-jaka no seluk tan,” nia esplika.
Tuir nia, komunidade sira ne’ebé mak kolleta ona nia toos ka natar, entaun nia sei la hetan, tanba nia konsege kolleta ninia produsaun, tanba foos sira ne’ebé autoridade RAEOA fó ne’e ba sira ne’ebé la kolleta ne’e.
Entretantu, estrada nasionál Pante Makasar ba to’o suku Suni-Ufe, sub-Rejiaun Nítibe lansa direita husi Autoridade RAEOA, iha fulan Agostu tinan 2022, no distánsia kilómetru 16 hahú husi ponte Noe-Fefan ba to’o suku Suni-ufe, Sub-rejiaun Nítibe.
Projetu reabilitasaun estrada nasionál Pante Makasar ba to’o Sub-rejiaun Nítibe ne’e ezekuta husi kompañia Internasionál PT. Waskita Kaya ho valor kontratu millaun 23 USD ne’ebé Autoridade RAEOA, prevee husi Orsamentu Jerál Estadu (OJE) tinan 2022 ho durasaun servisu fulan 18.
1,383 total views, 3 views today
Bele hare Video Seluk :
Subscribe to Timorpost
