DILI-Vise-Ministru Interior, Antonio Armindo, halo enseramentu atividade formasaun kona-ba ezaminasaun dokumentu ba ofisiál Servisu Migrasaun hamutuk ema na’in-20, hodi haforsa jestaun fronteira ida ne’ebé di’ak iha postu fronterisa territóriu nasionál tomak.
Informasaun ne’e Timor Post asesu hosi Media Ministeriu Interior nian iha loron Sesta (17/03), hodi ko’alia kona-ba Ofisiais hamutuk ema na’in-20 mak remata ona formasaun kona-ba Jestaun Fronteira nian.
Formasaun profisionál ne’e oferese hosi Governu Austrália, liuhosi nia embaixada iha Dili hodi kapasita ajente no ofisiál Migrasaun sira oinsá halo ezaminasaun ba dokumentu no deteta fraude sira hanesan pasaporte, kartaun identidade no mós osan falsu sira ne’e inklui kontrola krime organizadu sira.
Kursu refere realiza iha CFP (Centro Formação Polisia) Comoro, durante loron hat nia laran hahú hosi 13 to’o 16 Maiu 2023, no instrutór na’in-2 mai hosi Departamentu Home Affairs-Austrália.
Entretantu, ofisiál Migrasaun sira ne’ebé partisipa iha formasaun ne’e mai hosi sede sentrál Dili, Postu Fronteira Rejionál sira no mós Rejiaun Administrativa Espesiál Oe-Cusse Ambeno (RAEOA).
Iha biban ne’e, Vise-Ministru Interior, Antonio Armindo, agradese ba formadór/a hosi Australia, tanba bele fahe ona matenek balu ba ofisiais Migrasaun sira hodi aprende durante loron haat nia laran no husu atu nafatin kontinua formasaun sira seluk hodi haforsa seguransa iha fronteira.
1,984 total views, 9 views today
Bele hare Video Seluk :
Subscribe to Timorpost
