DILI, (timorpost.com) —Komandante Polísia Nasionál Timor-Leste (PNTL) munisípiu Dili, Suprintendente Xefe Polísia, Orlando Gomes, orienta membru atu halo patrollamentu rutina no rigurózu hodi hamate “kutun” joven sira ne’ebé gosta konflitu no asalta malu iha área postu administrativu Dom Aleixo, kapitál Dili.
“Ita agora planu atu orienta membru Polísia atu halo patrollamentu rutina no rigorozu area Postu Dom Aleixo para minimiza ka reduz ba kazu konflitus ka kazu asaltu malu entre joven sira iha area Dom Aleixo”, Komandante PNTL munisípiu Dili, Suprintendente Xefe Polísia, Orlando Gomes, informa ba jornalista sira iha nia kna’ar fatin, kuartel Polísia Dili, Kaikoli-Dili, Segunda, (20/11/2023).
Tuir observasaun komandu PNTL munisípiu Dili nian ba konflitus ka ataka malu entre joven sira husi postu administrativeu sira iha munisípiu Dili, postu administrativu Dom Aleixo maka sempre mosu konflitus ka kazu ataka malu, tanba ne’e sei iha atividade operasaun rutiña hodi kontrola joven sira iha postu administrativu ne’e.
“Provizoriu área Dom Aleixo maka kazu asaltu malu aas, ida-ne’e ita planu no organiza membru sira halo atividade patrullamentu la’o kontinua nafatin iha ne’ebá, patrullamentu ne’e sempre la’o iha tempu loron, tempu kalan ita kontinua halo vizilánsia nafatin para garantia estabilidade iha Dili”, Komandu PNTL munisípiu Dili alerta.
Enkuantu postu administrativu seluk iha Dili hanesan Kristu Rei, Nain Feto, Vera Cruz, no Metinaru ladún mosu konflitu ka ataka malu, maibé komandu PNTL nafatin koloka membru sira atu halo vizilánsia para labele mosu problema hanesan akontese iha Dom Aleixo.
Aliende ne’e Komandu PNTL munisípiu Dili halo partrullamentu rutiña ba postu administrativu ne’ebé konsideradu área konflitu, komandu mós koopera ho parte Komisaun Rekoladora Arte Marsiál (KRAM) la’o tama sai suku sira iha fatin konflitu sira ne’e halo sosializasaun, no halo diálogu ho komunidade para hotu-hotu hamutuk bele garante seguransa di’ak iha munisípiu Dili.(*)
468 total views, 9 views today
Bele hare Video Seluk :
Subscribe to Timorpost
