DILI, (timorpost.com)— Ministériu Edukasaun (ME) iha ona manuál ne’ebé di’ak ba implementasaun merenda eskolár iha eskola sira iha teritóriu nasionál, liuliu bandu estudante sira konsumu produtu kímiku sira.
“Ita iha manuál ne’ebe di’ak loos ba produtu lokál ba estudante sira, nune’e bele hamenus abitua produtu kímiku sira, iha menu ne’e rasik mós bandu atu konsumu produtu kímiku sira”, Sekretáriu Estadu Ensiñu Sekundária Jerál (ESJ) no Ensiñu Tékniku Vokasionál (ETV), Domingos Lopes Lemos, informa bainhira hala’o lansamentu ba programa merenda eskolár nian Eskola Báziku Sentrál (EBS) Faról, Segunda, (01/04).
Nia hatutan, hafoin lansamentu ohin ba programa merenda eskolár nian iha munisípiu Dili tuir kalendáriu ne’ebé iha, Ministériu Edukasaun (ME) sei halo sosializasaun ba iha eskola sira iha munisípiu.
Iha fatin hanesan, Diretora EBS Faról, Filomena Fátima Belo Freitas, lamenta ho programa merenda eskolár liuliu kona-ba menu anteriór ka tinan kotuk nian, livru menu ne’ebé sira hetan sei haree liu ba lala’ok preparasaun hahan ba estudante sira.
“Livru menu ne’ebé ami simu ami seidauk bele implementa, tamba haree ba oinsá atu prepara hahan sira, tamba iha menu ne’e hahan sira ne’e maioria tunu de’it, merenda eskolár ne’e implementa hahú husi loron Segunda to’o Sesta, iha loron Sábadu no feriadu ka aula la la’o, merenda eskolár mós sei la realiza”, Filomena, hatete.
Nia daudauk ne’e, seidauk iha esplikasaun detallu ba menu foun, tanba ne’e, EBS Faról nafatin la’o tuir menu anteriór ne’ebé iha loron-Segunda to’o Kuarta estudante sira konsumu etu ho na’an ka bifi, feijoada ou koto iha Kinta no Sesta estudante sira han foremungu.
Entretantu Prezidente Autoridade Munisipál (PAM) munisípiu Dili, Gregório Saldanha, ne’ebé partisipa mós iha lansamentu ne’e hatete, programa merenda eskolár ne’e importante tebes atu tulun estudante sira ne’ebé dalaruma la konsege matabisu bainhira mai eskola, ne’eduni ho programa ne’e bele ajuda sira atu tuir aula ho konsentrasaun di’ak, fízikamente no saudável, atu hasa’e mós nutrisaun estudante sira-nia.(*)
2,745 total views, 12 views today
Bele hare Video Seluk :
Subscribe to Timorpost
