Dili, (timorpost.com)—Ministériu Ensinu Superior Siénsia Kultura (MESSK) hamutuk ho Embaixada Tailándia iha Timor-Leste, realiza workshop oinsá atu loke kursu ba parteira sira no mós hadi’a kurríkulu parteira.
Workshop ida ne’e realiza husi Embaixada Tailándia iha Timor-Leste, ho objetivu atu tulun kandidatu parteira Timoroan sira ne’e daudauk ne’e hala’o hela estudu iha Instituisaun tolu hanesan iha Universidade Nasionál Timor Loro Sa’e (UNTL), Fundasaun Cristal no Institutu Ciências da Saúde (ICS).
Ministru Edukasaun Superiór, Siénsia no Kultura (MESSK), José Honório Jerónimo, hatete, Embaixada Tailándia iha Timor-Leste hakarak tulun tebes kandidatu parteira timoroan sira ne’ebé mak daudauk ne’e realiza hela estudu iha universidade tolu ne’e.
“Tailándia komitmentu tebes atu ajuda parteira timoroan liu-liu hadi’a kurríkulu no mós loke kursu sira hodi hasa’e koñesimentu parteira sira iha area refere. Parte ida mós oinsá métodu ne’e bele sai kurríkulu nasionál no padraun nasionál ida ba instituisaun hot-hotu ne’ebé loke kursu parteira”. Dehan Ministru Jose Honório ba jornalista sira iha Plaza, Segunda (29/04).
Ida ne’e importante tebes b kandidatu parteira sira, no mós ita fiar Governu Tailándia sei haruka sira nia dosente balun husi Universidade Tailándia nian atu mai fó apoiu bele hetan rezultadu di’ak iha futuru.
“Workshop ida ne’e ha’u sente sei hetan apresiasaun husi ita nia Universidade sira liu-liu UNTL , Cristal no ICS para mellora di’ak liu tan kurríkulu iha futuru”. Hakotu.
1,503 total views, 18 views today
Bele hare Video Seluk :