BAUKAU (timorpost.com) – Parlamentu Nasionál (PN) liuhosi Komisaun G, trata asuntu Edukasaun, Juventude no Desportu, halo fiskalizasaun ba iha Munisípiu Baukau hodi buka hatene problema edukasaun ne’ebé akontese iha baze.
Hafoin halo fiskalizasaun iha Servisu Munisipál Edukasaun Juventude no Desportu (SMEJD) iha Baukau, Prezidente Komisaun G, Antonio Verdial, hatete ida ne’e ikus hosi komisaun G iha mandatu ne’e, maibé sei hatutan problema hirak ne’ebé edukasaun Baukau nian ba Governu liuhusi plenária.
“Fiskalizasaun ne’e objetivu atu hala’o soru-mutu direta ho lideransa edukativa, manorin na’in sira, feto no mane atu rona sira-nia halerik ligadu ba iha profesór kontratadu, voluntáriu, no parsiais ne’ebé sai polémika, nune’e mós kona-ba bolsa merítiu”, nia hateten ba Timor Post, iha Baukau, Kuarta (08/03).
Nia esplika, iha Timor-Leste órgaun soberanu haat, iha nia servisu keta-ketak la manda malu, maibé interdependénsia no interligadu ba malu, tan ne’e saida mak deputadu/a komisaun G rona no observa iha Baukau sei hatutan halerik hirak ne’e ba Governu liuhusi relatóriu no mós liuhusi intervensaun membru ida-idak.
Atuál deputadu husi partidu KHUNTO ne’e afirma, maski mandatu atu remata, maibé kestaun ne’ebé membru Parlamentu Nasionál, komisaun G hetan iha munisípiu sira sei iha nafatin ninia sustentabilidade tanba sei mosu sesta lejizlatura.
Enkuantu ba profesór voluntáriu ne’ebé naran sai ona iha jornál repúblika provizoriamente sei pendente tanba ministériu edukasaun halo hela operasaun ba kestaun ne’e iha territóriu laran tomak.
Nia informa, Ministru rasik mak esklarese iha uma fukun parlamentu tanba lamentasaun barak mai husi manorin na’in sira iha territóriu nasionál maka temporariamente naran hirak ne’ebé hatuur tiha ona iha jornál repúblika ne’e sira sei pendente lai hodi bele rezolve.
Iha fatin hanesan, Diretór Servisu Munisipál Edukasaun, Juventude Desportu Baukau, Augusto Ornai Ximenes, hatete durante fiskalizasaun hosi komisaun G Parlamentu Nasionál, aprezenta pontu importante 10 hanesan progresu Projetu Konstrusaun Reabilitasaun Infraestrutura Edukativa implementa tinan 2021 hamutuk 29, ne’ebé implementa iha Baukau.
Alende ne’e aprezenta mós preokupasaun ne’ebé identifika hanesan rekursu umanu, infraestrutura báziku, ekipamentu, bolsu méritu inklui dezastre naturál ne’ebé estraga eskola balun iha munisípiu Baukau.
“Ha’u relata verbalmente inklui eskrita pontu sanulu importante ba komisaun G, atu bele akompaña problema ne’ebé Servisu Edukasaun Munisípiu Baukau enfrenta”, nia hateten.
2,299 total views, 3 views today
Bele hare Video Seluk :