DILI (timorpost.com) – Universidade da Paz (UNPAZ) hamutuk ho parseiru Internasionál Peace Youth Group (IPYG) Korea no parseiru nasionál no entidade sira hotu komemora loron Pas Mundiál ba dala 10.
“Atividade ne’e ami hamutuk ho parseiru internasionál IPYG Korea hodi komemora loron aniversáriu Pas Mundiál nian ba dala-10 ne’ebé eziste iha mundu tomak”, vise reitór asuntu akadémiku UNPAZ, Joanino Xavier, hateten ba Timor Post iha kampus UNPAZ Manleuana, Sábadu (27/05).
Vise reitór ne’e dehan, komemora aniversáriu ne’e au-mezmu tempu kria mós marsa iha UNPAZ, ne’ebé partisipa másimu husi estudante no estudante sira no mós estudante hosi eskola sekundária Annur no eskola Internasionál School mak partisipa iha marsa refere.
Nia dehan, atividade ne’e realiza iha kampus UNPAZ, tanba universidade mós hola parte iha organizasaun pas ida ne’e, entaun UNPAZ hamutuk ho NGO internasionál no NGO sira iha Timor-Leste no entidade relevante sira partisipa hodi komemora loron importante ne’e.
Kona-ba pas hodi hatudu ba jerasaun foun liuliu estudante sira iha UNPAZ no mós estudante husi universitáriu no estudante eskola primária to’o eskola sekundária sira iha Dili hodi promove pas no estabilidade iha sosiedade nia leet.
Enkuantu, programa promove pas ne’e dosente UNPAZ barak mak envolve iha programa ida ne’e no harii dezde tinan 2019 bainhira eventu importante iha nasaun Korea, dosente sira sempre ba partisipa hodi halo diskusaun kona-ba promove pas iha Timor-Leste liuliu UNPAZ.
“Tanba ami nia eskola UNPAZ ne’e iha departamentu ida kona-ba estudu da Paz, entaun ami sempre pratika matéria pas no estabilidade hodi hanorin ba estudante no mós desimina informasaun ba públiku iha nasionál no nivel rejionál kona-ba pas,” nia dehan.
Iha fatin hanesan, eis Ministra Edukasaun Juventude no Desportu (MEJD), Dulce Soares, hanesan oradór iha eventu refere, nia agradese no obrigadu ba UNPAZ ne’ebé mak simu NGO Internasionál ida ne’e hodi promove pas no estabilidade iha Timor-Leste.
Tanba ne’e, husu ba nafatin UNPAZ atu promove pas ida ne’e ba estudante no foinsa’e sira hodi kria pas no estabilidade iha sosiedade nia leet, hodi hatudu ba mundu katak, Timor nasaun ki’ik, maibé nia juventude no komunidade sira maduru tebes.
“Ita komemora loron pas mundiál ba dala-10 fiar katak, husi aniversáriu ida ne’e ba oin estudante sira bele banati tuir hodi kria pas no amizade iha rai laran hodi hatudu no sai ezemplu iha públiku nia matan,” nia hateten.
1,647 total views, 3 views today
Bele hare Video Seluk :
Subscribe to Timorpost
