DILI (timorpost.com) – Konsellu Ministru (KM) aprova prosedimentu aprovizionamentu reabilitasaun estrada Maliana no modernizasaun sistema abastesimentu bee no saneamentu iha sidade Lospalos, Vikeke no Same.
Ministru Obras Públikas (MOP), Abel Pires da Silva, partisipa iha reuniaun Konsellu Ministru (KM), ne’ebé lidera husi Primeiru Ministru (PM) Taur Matan Ruak iha Palásiu Governu.
Iha reuniaun Konsellu Ministru ne’e delibera ona aprova, tuir projetu ne’ebé aprezenta husi Ministru Obras Públikas, prosedimentu aprovizionamentu Reabilitasaun Estrada Munisipál sira, Pakote II – Seksaun Sidade Maliana Faze 1 (ICB/087/MOP-2022), ho valór estimadu millaun 13,6 USD.
Konsellu Ministru delibera ona autoriza mós tuir projetu ne’ebé aprezenta husi Ministru Obras Públikas, despeza ba kontratasaun konsultoria ida iha Jestaun Projetu nian ba Projetu Abastesimentu Bee no Saneamentu iha Dili (Dili Oeste), ho valor estimadu millaun 15,2 USD.
Ikus liu, Konsellu Ministru delibera ona autoriza, tuir projetu ne’ebé aprezenta husi Ministru Obras Públikas, despeza hodi hahú prosesu aprovizionamentu no formalizasaun tuir kontratu públiku ezekusaun obra nian modernizasaun sistema abastesimentu bee no saneamentu iha sidade Lospalos, Vikeke no Same.
Tanba ne’e, Konsellu Ministru autoriza despeza globál estimada millaun 66,83 USD ba prosedimentu aprovizionamentu ne’ebé sei halo iha lote tolu mak hanesan:
- Lote 1 – Modernizasaun sistema públiku abastesimentu bee no saneamentu ba sidade Lospalos ho valor estimadu millaun 22,48 USD
- Lote 2 – Modernizasaun sistema públiku abastesimentu bee no saneamentu ba sidade Vikeke ho valor estimadu millaun 23,76 USD
- Lote 3 – Modernizasaun sistema públiku abastesimentu bee no saneamentu ba sidade Same ho valor estimadu millaun 20,59 USD.
1,704 total views, 6 views today
Bele hare Video Seluk :
Subscribe to Timorpost
