Dili(timorpost.com)—Autoridade Munisípiu Dili (AMD), liuhosi Servisu Saneamentu menus funsionáriu, hodi kontrola servisu ra’ut fo’er iha terenu no tesi duut iha jardín sira iha Dili laran.
“Ami nia funsionáriu hamutuk na’in-200 ne’e la sufisiente hodi kontrola servisu limpeza no dasa rai iha edifísiu estadu, inklui tesi duut iha jardín hamutuk 17 iha Dili laran,” Xefe Departamentu Servisu Saneamentu Munisípiu Dili, Domingos Sariano dos Santos, informa ba Timor Post, iha ninia kna’ar fatin, Matadouru, Sesta (01/03).
Xefe Departamentu Servisu Saneamentu ne’e esplika, jardín hamutuk 17 kompostu husi jardín Kristu Rei, BJ. Habibie, Largu Lesidere, 05 de Maiu Kolmera, Bebora, Kolmera, Motaél no jardín hirak ne’ebé besik edifísiu BTL.EP Kolmera, jardín Estrada Elemloi, jardín Saudozu Francisco Xavier do Amaral, Merkadu lama.
Nune’e mós iha jardín hamoos ai-oan iha Estrada públiku hahú husi Palasiu Prezidente Bairru-Pité, to’o jardín Saudozu Nicolau Lobato Komoro, Estátua São Paulo II Tasi-tolu, maibé funsionáriu saneamentu uitoan de’it, entaun susar atu kontrola másimu iha terenu, maski servisu saneamentu ho kompañia lima ho kamioneta 50 kontrola hela, maibé difisil atu kontrola másimu.
Tuir nia haree komunidade rasik seidauk iha konxiénsia ne’ebé di’ak hodi tau fo’er tuir oras ne’ebé hahú iha tuku 6-7:00, nune’e servisu saneamentu kontrola iha terenu bele ra’ut hotu tau iha karreta, hodi lori ba lixu Tibar, maibé dala-barak la tau fo’er iha lixu fatin ne’ebé estadu prepara no hatuur iha dalan públiku, kuandu udan boot bee tun ho volume boot lori fo’er hamosu inundasaun.
Realidade hatudu daudaun fo’er nakonu iha portaun merkadu Taibesi, maski pesoál saneamentu munisípiu Dili loron ida ra’ut fo’er dala-tolu, maibé komunidade prodús fo’er barak no la tau fo’er iha fatin lixu, susar tebes ba funsionáriu saneamentu hodi kontrola másimu iha terenu.
Durante Funsionáriu Saneamentu servisu maka’as no hetan mós apoiu husi Sekretariadu Estadu Asuntu Toponímia Organizasaun Urbana, hodi kontrola iha terenu kona-ba ijiene orden públiku liga ba dekretu lei númeru 33/2018, maibé komunidade rasik laiha konxiénsia atu soe fo’er iha lixu fatin.
“Iha tinan kotuk, ami rekomenda ona ba Komisaun Funsaun Públiku, hodi rekruta tan funsionáriu saneamentu munisípiu, atu haforsa servisu kontrola ra’ut fo’er iha terenu, maibé orsamentu laiha, ne’ebé la konsege rekruta, entaun difikulta mós ba servisu saneamentu iha terenu”, nia preokupa.
Iha fatin seluk, komunidade Suku Lahane Oriental, Adélia Soares da Costa Pereira, preokupa ho fo’er iha area Taibesi besik merkadu kada loron fo’er sempre bou nakonu iha portaun oin, maibé servisu saneamentu munisípiu Dili ladún kontrola másimu hodi ra’ut.
Nia husu ba servisu saneamentu ne’ebé kontrata kompañia 5 ho karreta kamioneta hamutuk 50 tenke kontrola másimu hodi ra’ut fo’er iha terenu, kompañia labele manan de’it osan estadu nian, maibé la orienta nia membru sira servisu ra’ut fo’er iha terenu.
3,480 total views, 3 views today
Bele hare Video Seluk :
Subscribe to Timorpost
