Dili (Timor Post)–Sekretáriu Estadu Komunikasaun Sosiál (SEKomS), Kinta (21/07) hala’o programa Kampaña Literasia Dijitál ba Estudante sira iha Eskola Sekundáriu Kristal, Balide atu kompriende utiliza telemovel Smartphone.
Tuir Sekretáriu Estadu Komunikasaun Sosiál, Mericio Juvinal dos Reis “AKARA”, iha nia diskursu ba estudante sekundária Kristal sira katak númeru ne’ebé mak ema asesu ba liña internet barak liu duke kompara ho sidadaun ne’ebé iha Timor-Leste.
“Ha’u iha ona dadus katak, númeru ne’ebé ema asesu internet iha Timor-Leste ne’e, barak liu fali sidadaun, ita-nia sidadaun agora hamutuk juta 1 resin de’it, maibé dadus ne’ebé ami simu ona katak, ema ne’ebé asesu internet la’ós ona dadus sidadaun nian, entaun liu tiha ona juta 1,” nia afirma ba estudante sira iha salaun Fundasaun Kristal.
Nia subliña, husi ida ne’e, nia husu ba ema ne’ebé lori dadus ba ekipa SEKomS, katak tanba saida mak hanesan ne’e, nune’e sira hatete ba AKARA dehan, tanba maioria ema hotu-hotu kaer Telemovel, nune’e iha Telemovel nia laran ne’e, uza simcard rua no bele tolu, entaun simcard sira ne’e, asesu hotu internet.
“Sidadaun juta 1 mak kaer Telemovel, portantu husi simcard tolu ne’ebé iha Telemovel ne’e ita soma de’it ho sidadaun Juta 1 ne’e barak liu, husi ida ne’e mak akontese iha ita-nia rai. Sa tan Telemovel ne’ebé ita-nia maluk China sira fa’an agora ne’e la’ós simcard ida de’it, no kada ema mós uza Telemovel rua tolu, entaun ema kaer Telemovel ne’e barak liu fali sidadaun iha Timor-Leste,” nia dehan.
Nia subliña, Telemovel agora mós la’ós hanesan tempu uluk mak, Alcatel no seluk-seluk tan. Ho ida ne’e, husi parte konsidera Telemovel agora Telemovel matenek, husi ida ne’e, tenke kuidadu.
“Labele Telemovel ne’e mak matenek liu ita, tanba nia naran ne’e Smartphone. Nune’e ita hakarak, ita ema mak matenek liu, kompara ho Telemovel Matenek nian, tanba ita mak utiliza se ita mak beik liu fali Telemovel Matenek ne’e, nia sei estraga ita-nia kakutak, tanba husi Telemovel Matenek ne’e ho ninia situs sira ne’e mesak oi-oin de’it, depende ba ita-nia utiliza,” nia hakotu.
2,244 total views, 3 views today
