DILI (Timor Post) —Tribunál Distritál Dili (TDD), hala’o julgamentu ba kazu ema sivíl baku membru Forsa FALINTIL Defeza Timor-Leste (F-FDTL) na’in ida ho inisiál JCP, iha Tasi-Tolu, iha 2020.
Tuir faktu ne’ebé Tribunál lee sai katak, iha loron 21 Agostu 2020, tuku 4:30 madrugada lezadu bainhira sai hosi serbisu atu fila-fali ba uma to’o iha Tasi-Tolu hetan palang hosi arguidu JRM ho nia maluk na’in tolu seluk, hodi husu osan ba lezadu atu sosa sigarru maibé lezadu osan laiha.
Lezadu nu’udar membru F-FDTL ne’e husu ba arguidu JRM no nia maluk hodi dehan imi hanesan ema militár ka seguransa mak palang fali, nune’e lezadu lori telefone iha bolsu atu komunika ba maluk seluk, maibé arguidu JRM lori fatuk hodi tuda ba lezadu kona iha parte ibun rezulta naklees ran sai makas ho nehan oin ida monu sai no halo dezmaia monu ba rai kuaze minute 15, inklui telefone ida ho folin $250 rahun ka hetan estragu.
Hafoin ne’e lezada ba halo tratamentu iha ospitál suku pontu lima ba kanek ne’ebé iha.
Hahalok arguidu nian obriga ema seluk hodi ameasa hetan vantajen patrimonial.
Nune’e MP akuza JRM hanesan autór materiál konkursu ba krime rua hanesan Danu ho violénsia previstu iha artigu 260, ne’ebé hateten kuandu ajente prátika faktu sira-ne’ebé hakerek hela iha artigu 258 no 259 ho violénsia hasoru ema ruma ka ho ameasa ho perigu eminente ba vida ka integridade fízika, ka tanba tau hela ema ne’e iha situasaun ne’ebé nia labele reziste, sei aplika pena prizaun tinan haat (4) too 12.
No krime estorsaun previstu artigu 270, deskreve iha alínea 1.ema ne’ebé, ho intensaun atu hetan ba nia ka ba ema seluk enrikesimentu ilejítimu, obriga ema seluk, ho violénsia ka ameasa ho mal importante, halo dispozisaun patrimonial ne’ebé hamosu prejuizu ba ema ne’e ka ba ema seluk, sei hetan pena prizaun tinan rua too neen.
Kuandu mosu sirkunstánsia ruma prevista iha artigu 252 ajente sei hetan Pena previstu iha artigu ida-ne’ebá no Alínea 3.
Atu hala’o prosedimentu kriminál tenke iha keixa, ne’ebé previstu hotu-hotu iha kódigu penál.
Hafoin iha sesaun julgamentu haree ba krime estorsaun ho nia natureza semi públiku tuir prosesu bainhira arguidu no lezada iha konkordánsia ba malu bele dada fila rezolve tuir família.
Ba parte sira iha lejitimidade hodi aprezenta akordu ba Tribunál, tanba prosesu refere antes ne’e rezolve tuir família hosi parte arguidu fó sala ona ba lezada ho montante osan $1000, Tais, bibi, sigarru hodi dame malu.
Nune’e koletivu juiz omóloga hodi absolve arguidu hosi krime estorsaun iha Tribunál primeira instánsia no krime danu ho violénsia nu’udar natureza públiku labele dada fila tanba ne’e kontinua julgamentu ba oin.
Liu hosi audiénsia julgamentu hatán ba akuzasaun sira, arguidu JRM konfesa ho parsialmente ba Tribunál katak faktu sira ne’e loos hotu, momentu ne’ebá sira halo asaun ne’e tanba hemu tua lanu, nó konxiente hahalok ne’e ladi’ak, perante iha Tribunál sei la halo tan ba oin.
“Ha’u mak tuda uluk fatuk primeiru hodi kona vítima iha parte ibun”, arguidu hatete iha sala audiénsia TDD
Lezadu JCP, konfirma kanek ne’ebé sofre hetan tratamentu no lori tempu fulan ida mak rekupera no nehan iha rua mak daudaun sei nakdoko ne’ebé bainhira han buat sei sente moras.
Rona tiha parte sira Tribunál adia fila-fali julgamentu ba loron seluk hodi rona sasin ne’ebé arroladu ona.
Julgamentu ne’e prezide hosi juis koletivu, Ercília de Jesus, Afonso Carmona, Albertina Neves no MP reprezenta hosi prokuradór na’in ida no arguidu hetan asisténsia legál hosi defensór públiku Nelson Borges. (jxy)
1,214 total views, 3 views today
Bele hare Video Seluk :
Subscribe to Timorpost
