Dili (timorpost.com)— Jogu Kontinuasaun Liga Futeból Timor-Leste (LFTL), Primeiru Divizaun, iha Estádiu Munisipál Dili, ekipa AD SLB Laulara ho nia jogadór na’in-sia, de’it susesu hurulele Emmanuel Fc score 2-0.
Iha jogu primeiru parte ekipa rua mai kedas ho nia filozofia jogu ida-idak ninian, maibé ekipa rua kuaze uza formatu hanesan nune’e mós ho tátiku jogu tiki taka mós hanesan.
Tanba ne’e minutu dahuluk ekipa rua lansa kedas kontra atake ba malu ho ritmu jogu ne’ebé mak aas kedas, tanba hakarak manán hotu jogu ba ohin loraik ninian hosi aumenta sira nia pontus.
Maibé haree ba kompozisaun jogadór ekipa SLB nia jigante liu kompara ho Emmanuel Fc ne’ebé mak foin promovidu hosi segunda divizaun, tanba SLB tun kedas ho nia jogadór sira maioria Selesaun Nasionál inklui avansadu brilante, Mouzinho Barreto de Lima.
Ho ida ne’e ekipa SLB Laulara ho tátiku jogu ne’ebé mak furak iha minutu dahuluk ne’e aproveita kedas hodi buka oportunidade, jogadór avansadu, Zenivio Mota, susesu hatama golu ba rede Emmanuel nian, hodi lori nia ekipa lidera provizóriu ho score 1-0.
Maibé diabu aat tenta jogadór Avansadu refere, iha minutu 28 halo erru hasoru nia adversáriu sira nune’e árbitru foti desizaun fó kartaun mean ba nia hodi haruka nia sai hosi kampu laran.
Tanba ne’e ho SLB nia jogadór menus ida ne’e halo ekipa Emmanuel lansa atake maka’as ba sira hodi hakarak hatama golu, maibé to’o jogu primeiru parte termina la konsege hatama golu hodi ekipa SLB lidera provizóriu 1-0.
Tama fali ba segundu jogu ekipa Emmanuel mida nia estratéjia hodi hasa’e tan sita nia ritmu jogu halo atake no fó ameasa ne’ebé mak perigu beibeik ba SLB hodi hakarak hatama golu.
Maibé defeza hosi ekipa Makikit Laulara ne’e lakohi fó ulun hodi avansadu Emmanuel ninian liu sira hodi hatama golu ba sira nia rede, tanba sira halo moru defensivu ida ne’ebé mak maka’as tebes.
Nune’e iha minutu 89, jogu besik atu termina ona, avansadu SLB Mouzinho de Lima ho nia indivíduu halo kontra atake maka’as susesu hatama tan golu ida hodi aumenta score ba 2-0, maibé iha minutu extra arbitu deside fó tan kartaun mean ba defeza SLB Gumario Morreira, maibé laiha mudansa ba rezultadu to’o jogu remata SLB manan ho score 2-0.
1,327 total views, 6 views today
Bele hare Video Seluk :
Subscribe to Timorpost
