(Reportajen Caetano Guterres/Editor Mariano Martins)
BAUKAU- Kandidatu Prezidente Repúblika períodu (2022-2027), Martinho Gusmão, ohin, ezerse nia votu iha Sentru Votasaun Suku Bahu, Postu Administrativa Baukau-Vila Munisípiu Baukau, nia apela nia kolega kandidatu na’in-15 sira seluk atu hatudu maturidade polítika no respeita povu nia desizaun.
“Ita sira ne’ebé sai kandidatu iha momentu ida-ne’e maka hatudu maturidade polítika, respeita povu nia desizaun, konstituisaun hatete katak soberania ne’e iha povu nia liman”, hateten kaprez númeru 13 ne’e ba jornalista Timor Post iha fatin votasaun.
Maski durante kampaña sidadaun balun ko’alia barak kona-ba lider istóriku, maibé Tuir Martinho ne’e la signifika lider istóriku mak halo istória.
Timor-Leste harii hosi povu nia determinasaun liuhosi eleisaun no liuhosi eleisaun, Povu rasik maka hodi kosar been no ran maka harii nasaun ida-ne’e,” Dosente Institutu Superior De Filosofia E Teologia (ISFIT) ne’e hatete.
Tuir observasaun jornalista nian kandidatu prezidente númeru sorteiu 13 ne’e to’o iha sentru votasaun area sentrál, Suku Bahú iha oras tuku 07:45, ho kareta Hilux (A 21-501 TLS) akompaña hosi polisia Corpo Seguransa Pesoál (CSP), forma iha liña no ezerse votus iha oras.
803 total views, 6 views today
