Baukau(timorpost.com)—Padraun Karreta Bus Andy Makmur, Adão Noé Neto Fraga “Sakunar Lemorai Teki Timor”, la konkorda ho desizaun mudansa oráriu sirkulasaun transporte públiku, ne’ebé hasai husi Diresaun Nasionál Transporte Terretre (DNTT) ho Polisia Nasionál Timor-Leste (PNTL), liuhosi Departamentu Tránzitu Seguransa Rodaviariu Nasionál.
Padraun Karreta Bus Diresaun Munisípiu Baukau mai Dili, la konkorda total ho desizaun mudansa oráriu sirkulasaun, ho razaun katak Bus atu sirkula ho oras tuku 6:00 dadeer san, fó impaktu ba movimentu sidadaun nian.
“Ha’u hanoin nesesidade importante ita la presiza la’o oras tuku neen, tanba nasaun ne’e livre, nasaun demokrasia, ita ko’alia kona-ba direitu liberdade demokrasia, ema ida nia direitu ita labele impede, kuandu Bus tula pasajeiru halo krime, Polisia iha kompeténsia atu kaer tuir lei, iha ita nia nasaun kumpre lei, ha’u hanoin laiha krime ruma,” Teki Timor informa ba Timor Post, iha ninia rezidénsia, Kinta (29/02).
Loloos ne’e sirkulár labele vale ba Padraun Bus, sirkulár tenke vale ba kualkér transporte públiku no privadu hothotu, nune’e ema hotu labele halo sirkulasaun ho tempu kalan.
“Sirkulár ne’e labele ba ami bus na’in de’it, tenke vale mós ba Estadu, Governu hahú husi Presidente Repúblika, Primeiru Ministru, Parlamentu Nasionál, Ministériu, Sekretariadu Estadu no Diresaun hotu-hotu, ita hotu tenke kumpre sirkulár ne’e, se sirkulár ba de’it ami bus na’in, ami la konkorda, ami halai nafatin hanesan bai-bain tuku haat dadeer san, sirkulár ami la kumpre ita lori malu ba tribunal”, nia kontra makaas.
Desizaun ne’e fó impaktu ba pasajeiru sira ne’ebé durante ne’e sai ona parseiru ba karreta Bus, hanesan Funsionáriu Públiku, Estudante Universitáriu no negosiante sira, tanba baibain sai husi Baukau tuku haat to’o iha terminal Bekora Dili tuku neen ho balun.
“Ita nia funsionáriu ne’ebé servisu iha Dili tuku ida ka tuku rua sira telefone ona ami, dehan aban dadeer san ami tama servisu mais laiha transporte privadu, oras hanesan ne’e bele to’o ona iha ne’ebá ka lae, ne’ebé funsionáriu no komunidade ne’ebé nesesidade urjente sira kontaktu, atu ami fasilita to’o lais iha Dili, to’o agora ha’u nia bus halai seidauk hetan problema ruma”, nia hateten.
Entretantu, Diretór Transporte Terrestre munisípiu Baukau, Roberto da Crus, hatete, simu ona karta despaxu husi DNTT iha loron 28 ho konteúdu, Diresaun Nasionál dos Transporte Terrestre, hamutuk ho Polisia Tránzitu Nasionál hato’o ba bus na’in, motorista no komunidade.
Iha sirkulár ne’e, hahú fulan Marsu 2024, sei iha mudansa ba oráriu sirkulasaun Bus, viajen Dili ba munisípiu no munisípiu mai Dili hahú tuku 7: 00 dadeer san, tanba viajen kalan altera oráriu sirkulasaun ba viajen loron.
“Ha’u nu’udar servidór estadu atendimentu públiku ha’u nia haree iha ninia di’ak, iha ninia aat, ninia di’ak maka fó salva guarda pasajeiru ne’ebé la’o kalan, bainhira kondutór matan dukur, kolen dala-ruma mós fatin sira ai-tohar no rai halai sirkulár ne’ebé fó sai husi nasionál, ha’u hanoin loos, ninia la di’ak maka karik kondutór, karreta na’in ho komunidade la satisfás sira bele hato’o fali karta ruma ba DNTT ho Polisia Tránzitu Nasionál, ha’u nu’udar servidór estadu ha’u kumpre no fahe informasaun de’it”, nia hakotu.
Antes ne’e, Xefe Departamentu Tránzitu Seguransa Rodaviariu Nasionál (DTSRN), Superintendente Asistente Polisia Luis da Costa, hatete, hahú husi inisiu fulan Marsu, Polisia Tránzitu munisípiu Dili, sei koordena ho DNTT, hodi impoin regra ba karreta bus hotu, ne’ebé tama mai Dili presiza estasiona iha terminal.
“Terminal sira ne’e, tuir loloos DNTT nia servisu atu haree, maibé ami sei halo koordenasaun atu haree terminal sira iha Dili laran, atu impoin regra, bus hotu tama Dili para iha terminal,” Luis informa ba Jornalista sira, iha ninia knaar fatin, Kuartél Jerál PNTL, Kaikoli.
Terminal Bekora labele akumula bus husi munisípiu haat, hanesan Manatutu, Baukau, Vikeke no Lautem, DNTT ho PNTL sei komunika ho Presidente Autoridade Munisípiu Dili, atu autoriza mós Terminal Taibesi para Bus husi Munisípiu haat ne’e bele estasiona.
“Problema terminal sira ne’e ita sei halo koordena ho Autoridade Munisípiu Dili, atu haree terminal merkadu Taibesi bele akumula mós bis husi munisípiu haat, tanba iha inisiu Marsu bus tenke estasiona iha terminal iha Dili”, nia dehan.
Fatin públiku hanesan Pantai-kelapa ho Fomentu nian, bus balun kontinua estasiona iha ne’ebá, situasaun ida ne’e ba oin, PNTL ho DNTT sei haree. Bainhira bus sira tula pasajeiru atu viajen ba munisípiu tenke sai husi fatin (Dili) oras tuku 06:00 dadeer labele sai fali kalan madrugada.
“Avizu ne’ebé ita hasai ona kondutór sira maka tenke halo jestaun tula pasajeiru iha Suku no Aldeia, maibé atu viajen labele kalan boot tuku 06:00 maka halo viajen, bainhira sira la kumpre maka ita sei halo atuasaun aplika koima ba sira, tuir lei kódigu estrada”, nia hateten.
Tuir karta sirkulár ne’ebé autoridade konjuntu hasai informa ba bus na’in, Motorista no komunidade hotu katak, hahú fulan Marsu 2024, sei iha mudansa ba oráriu sirkulasaun bus ho tarjetu husi Dili ba munisípiu no munisípiu mai Dili, husi viajen kalan altera ba viajen loron. Nune’e munisípiu ne’ebé hetan mudansa oráriu maka hanesan, Lautem, Vikeke, Baukau, Bobonaru, Manufahi no Ainaru.
2,853 total views, 9 views today
Bele hare Video Seluk :
Subscribe to Timorpost
