timorpost.com I Oekusi-Kampu futeból Padeai, Postu Pante Makasar, Rejiaun Administrasaun Espesial Oe-kusi Ambeno, ‘rabenta’ ho militante no simpatizante partidu FRETILIN.
Tuir observasaun Timor Post, ba komisiu FRETILIN iha RAEOA, sabadu, 06/05, militante simpatizante organiza malu tama iha kampu futebol iha oras tuku 11:00 to’o tuku 14:00, hein lideransa troika Fretilin to’o iha fatin hodi hahu atividade komisiu.
Lideransa troika FRETILIN to’o iha fatin simu ho dansa tradisional komunidade Oe-kusi oan, depois ida ne’e tara kedas tais ba lideransa troika hodi akompaña hakat tama iha palku komisiu Padeai Pante Makasar.
Hafoin lideransa troika to’o iha fatin hodi hola fatin iha palku, master serimonia komisiu loke ho introdusaun Prezidente RAEOA, Arsenio Bano, hafoin ida ne’e tama kanta hino partidu, kontinua kedas ho minutu silensiu ba herois.
Remata tiha minutu silensiu entrega kedas ba ekipa animasaun hodi anima ho militante simpatizante Fretilin ne’ebé nakonu-resin tantu joven, inan-aman hotu-hotu dansa ho liman iha leten hodi hatudu katak sira vota ba númentu 11 Fretilin nian.
Iha komisiu ne’e, Kordenador Jeral RAEOA, Arsenio Bano, ho nia intervensaun tatete, ho prezensa militante no simpatizante Fretilin iha kampu futebol Padeai ne’e hatudu katak, sub-rejiaun Pante Makasar sei fo vitoria apsoluta ba partidu Fretilin iha eleisaun parlamentar 2023.
“Permite Ha’u senior Sekretariu Jeral Fretilin, atu hatete de’it katak Ita bele garantia katak dia 21 Pante Makasar sei fó vitoria ba Fretilin, manan maioria”, Koordenadór Jeral Fretilin RAEOA, Arsenio, informa.
Tanba povu hatene ona, didi’ak governasaun oitavu governu ne’ebé Fretilin ba viabiliza konsege halo programa ne’ebé povu rasik hetan ona benefisiu, atu kontinua ba oin povu prontu fó votu ba Fretilin hodi hadia povu nia moris di’ak no dignu iha futuru.
“Ha’u garante sub-rejiaun hotu-hotu iha Oe-kusi, atu vota ba Fretilin para hodi implementa programa sira ne’e atu hasai povu husi kiak no mukit ba moris dignu”, Arsenio esplika.
Nune’e, nia garantia sub-rejiaun sira iha RAEOA, militante simpatizante maka sei vota Fretilin manan maioria iha RAEOA, atu Fretilin kontinua ukun hamutuk ho partidu aliadu sira hotu-hotu para ukun atu liberta povu husi ki’ak no mukit ba moris di’ak no dignu. (*)
1,735 total views, 3 views today
Bele hare Video Seluk :
Subscribe to Timorpost
