KELIKAI (Timor Post) – Militante PLP (Partidu Libertasaun Popular) munisípiu Baukau deklara an hodi fó apoiu ba partidu CNRT tanba programa partidu CNRT lideradu Kay Rala Xanana Gusmão nia programa di’ak liu.
“Ha’u deside an sai husi PLP hodi mai fó apoiu ba partidu CNRT tanba partidu CNRT iha nia programa di’ak kompara ho partidu PLP maski husi partidu PLP fó projetu bah au kaer maibé ida ne’e la konvensaun ha’u tanba kuandu ita ko’alia kona-ba polítika ita tenke hare ba ema barak nia di’ak la’ós ita pesoál de’it tanba ne’e ha’u husu ba sidadaun Kelikai oan apoia partidu CNRT liu-liu maun boot Xanana Gusmão nune’e bele hadi’a hikas situasaun rai laran”, dehan militante PLP Domingos Samasula, domingu (1/8) iha serimónia re-ajustamentu partidu CNRT nian iha suku Lakoliu postu Kelikai.
Nia esplika molok sai husi PLP tama iha partidu CNRT, ba hasoru uluk responsavel OMP partidu CNRT hodi promote pontu importante tolu, mak hanesan primeiru bainhira tama partidu CNRT osan sei sirkula, povu sei livre no Dezenvolvimentu sei la’o tan ida ne’e mak hakarak mai fó apoiu CNRT.
Nia afirma, razaun sai husi PLP tanba partidu libertasaun popular nia laran kria grupuismu, iha ne’ebé daudaun ne’e mosu grupu Mate restu ho grupu ida seluk grupu Fidelis, no kontinua sei la’o hanesan ne’e nasaun sei la la’o ba oin tanba ne’e ha’u ohin mai hamutuk ho estrutura partidu CNRT nasionál, munisípiu, postu halo reajustamentu husu para hotu-hotu servisu hamutuk servisu makas oinsá lori maun Xanana kaer ukun iha 2023 mai.
“Ha’u ba ko’alia ho OMP promote mai ha’u buat tolu de’it, mai apoiu partidu CNRT osan sei sirkula iha baze, povu sei livre asesu ba mai no dezenvolvimentu sei la’o iha baze promote pontu tolu ne’e mak ha’u hakarak fila mai CNRT, kuandu ami iha PLP iha de’it mak grupu, grupu ida naran grupu Mate Restu grupu ida naran grupu Fidelis, se hanesan ne’e partidu sei la la’o ba oin, liu-liu nasaun sei la la’o ba oin”, Samasula promote.
Nia hatutan, hanesan militante husi partidu ida mai iha partidu CNRT promote sei hala’o servisu partidu nian iha kualkér tempu tanba ne’e lakohi halo promesa maibé hakarak servisu oinsá fó susesu ba maun boot Xanana iha eleisaun rua tuituir malu atu nune’e bele lori fali dezenvolvimentu.
Iha tempu hanesan, koordenadór partidu CNRT postu administrativu Kelikai, Manuel Belo Soares, hatete ho prezensa militante PLP nian mai iha partidu CNRT espera eleisaun rua tuituir malu partidu CNRT sei manan, tanba ema ne’ebé influensia iha partidu PLP maibé bele fila fali mai CNRT tanba haree ba maun boot Xanana nia vizaun no misaun ba nasaun ne’e di’ak tebes.
“Hanesan responsavel partidu CNRT sente kontente tanba ema influensia boot partidu CNRT iha Baukau fila mai hamutuk ho CNRT tanba ne’e ha’u fiar partidu CNRT sei manan iha Kelikai”, dehan Manuel.
Entretantu, kuadru polítika partidu CNRT nasionál, Veneranda Lemos husu ba kuadrus no militante postu administrativu Kelikai, suku to’o aldeia atu loke liman hodi simu maluk Timoroan sira liuliu Baukau-Kelikai oan ne’ebé hakarak fila ba iha partidu CNRT hamutuk ho maun boot Xanana para kaer fila fali governasaun hodi bele hadi’a hikas situasaun iha rai laran.
“Ha’u husu ba kuadru partidu CNRT iha postu, suku no aldeia bainhira iha ita nia maluk Timor oan, Baukau oan liuliu Kelikai oan sira mai ita tenke simu ho liman rua, tanba sira rasik hare ona ho matan no sente rasik situasaun iha Timor oinsá”, dehan Veneranda.
Tuir observasaun jornalista nian iha terenu nota katak, koordenadór PLP postu administrative Kelikai direita hasoru malu ho kuadru poétika nasionál atu oinsá iha tempu besik hakarak lori sai nia militante sira atu ba fali partidu CNRT.(gut)
895 total views, 3 views today
Bele hare Video Seluk :
Subscribe to Timorpost
