BAUKAU- Krus Vermella Timor-Leste (CVTL), Segunda (19/06), realiza atividade Juventude Produtivu (JUPRO), iha Aladeia Darasula, Suku Gariuai, Postu Administrativu Baukau Vila, Munisípiu Baukau.
Sekretariu Jeral Crus Vermella Timor-Leste, Luis Pedro Pinto, hatete, objetivu husi atividade JUPRO CVTL nian ne’e atu akumula joven sira oinsá halo mudansa no fó hanoin ba malu entre juventude sira husi munisípiu hotu iha timor laran inklui juventude husi nasaun Indonézia, Korea do Súl no Singapura.
“Eventu ida ne’e oinsá mak atu akumula juventude hotu-hotu para halo mudansa liuliu oinsá mak ita-nia joven sira ne’ebé ami konvida husi munisípiu 13 inklui mós juventude kruz vermela husi nasaun Indonézia, Korea do Súl no Singapura sira mai hamutuk partilia informasaun ba malu, no fahe esperiensia ba malu para sai juventude ne’ebé forte hodi fó kontribui ba Timor-Leste nia dezenvolvimentu,” nia hateten ba Timor Post, iha kampu darasula-Gariuai.
Nia dehan, Interkámbiu Internasionál Youth Camp, JUPRO-Juventude Produtivu husi CVTL ho tema “Asaun Umanitariu ne’ebe Efetivu liu no Sustentabilidade.
Nia esplika, eventu interkámbiu akampamentu JUPRO ba dahaat ne’e, juventude sira sei reforsa malu oinsá atu sai juventude ne’ebé forte,juventude ne’ebé produtivu no juventude ne’ebé bele hare’e ba oin hodi kontribui ba dezenvolvimentu nasaun.
Iha fatin hanesan Diretor Jeral Sekretariu Estadu Juventude no Desportu, David Tomas de Dues, hatete oitavu governu rekuñese juventude voluntariu hanesan rekursu potensial hodi kontribui ba dezenvolvimentu nasional, tanba ne’e atu konkretiza SEJD halo identifikasaun ba organizasaun juventude sira hotu iha timor laran inklui CVTL sai hanesan parseiru iha SEJD.
“Oitavu Governu rekoñese juventude hanesan rekursu importante no rekursu potensiál atu kontribui ba dezenvolvimentu iha ita-nia pais, atu konkretiza ida ne’e SEJD hanesan sekretariu estadu ida ne’ebé tau matan ba juventude ami fó espasu barak ba joven sira konkretizasaun ida ne’e ami identifika ona organizasaun eziste iha Timor-Leste inklui CVTL hodi sai mós parseria ida iha SEJD hodi implementa programa sira ba ita-nia joven sira,” dehan David.
Entretantu Sekretáriu Autoridade Munisípiu Baukau, Simão Marques Pinheiro, apela ba juventude voluntáriu CVTL husi munisípiu 13 atu buka aprende ho juventude Krus Vermella husi nasaun Indonézia, Korea do Súl no Singapura, nune’e bainhira akontese dezastre nasionál ruma hotu-hotu preparadu atu kombate.
“Hanesan autoridade munisípiu, ha’u apresia ho atividade JUPRO ne’e, tanba ne’e apela ba juventude voluntáriu CVTL husi munisípiu 13 atu buka aprende ho juventude Krus vermella husi nasaun Indonézia, Korea do Súl no Singapura, nune’e bainhira akontese dezastre nasionál ruma hotu-hotu preparadu atu kombate,” nia apela.
Orsamentu ba aktividade iterkámbiu akampamentu juventude produtivu ba dahaat ne’e hamutuk rihun 60 USD, ne’ebe suporta husi SEJD, Krus Vermella Korea, (IFRC) International Federation Red Cros no Crus Vermella Australia.
Enkuantu totál juventude husi munisípiu 13 hamutuk ema nain-800 resin, serimónia abertura ne’e partisipasaun husi autoridade sivíl no militár inklui Prezidente Interinu CVTL ho nia estrutura.
Hakarak informa katak iha serimónia abertura interkámbiu akampamentu JUPRO da haat nian, autoridade sira husik mós manu pombu hanesan simbólu dame nian.
2,881 total views, 3 views today
Bele hare Video Seluk :
Subscribe to Timorpost
