DILI (Timor Post)- Parlamentu Nasionál (PN), preokupa ho servisu Komisaun Anti Korrupsaun (KAK), ho Ministériu Públiku (MP), nian iha terenu, tanba ladún la’o ho di’ak.
Vise Prezidente Bankada Partidu Kongresu Nasionál Rekonstrusaun Timorese (CNRT), Patrocino Fernandes, hatete servisu instituisaun rua ne’e nian durante ne’e hein de’it mak keixa, la’ós sira mak buka hodi rezolve.
“Ita haree sosiedade barak mak sai hanesan parseria Governu, atu harii instituisaun ida nu’udar fatin defensór ba Direitu Umanu (Human right), no mós defende ba Orsamentu Jerál Estadu nian, (sovereign wealth funds), ne’e ita apresia no louva”, nia hateten iha PN, Kuarta (04/08).
Nia dehan, programa Governu nian ne’ebé falla, entaun instituisaun ba direitu umanu iha direitu atu buka tuir kazu nia kronolojia, ezemplu problema konstrusaun igreja iha area Ai-mutin durante ne’e seidauk, entaun instituisaun hanesan Ministériu Públiku ida tenke buka tuir, tanba ne’e programa Governu.
Instituisaun Estadu nian ne’ebé Governu harii fó kna’ar ba sira atu kontrola sidadaun sira-nia direitu, devér, no programa sira ne’ebé Governu tau osan, tuir loloos instituisaun rua ne’e tenke buka tuir hodi hatene kazu públiku ida ne’e.
Nia dehan, Programa ne’ebé Governu tau osan, sai hanesan kazu ida, ne’ebé sai preokupasaun ba públiku, entaun instituisaun hanesan Ministériu Públiku, KAK no selu tan, presiza buka kazu ne’e atu hatene nia progresu.
Tanba hanesan sosiedade sivíl la presiza hein kazu no hein sidadaun ida mai keixa mak foin buka hatene, nune’e bainhira ema barak preokupa ona buat ruma hosi programa Governu ka sidadaun ida, entaun hanesan sosiedade sivíl iha obrigasaun para buka hatene.
Tanba sosiedade sivíl nia servisu kuaze hanesan ho jornalista sira, investiga informasaun hasai ba públiku, tuir loloos Ministériu Públiku hop KAK tenke hanesan ne’e.
Kazu ida sai preokupasaun liuhosi lala’ok Estadu, tenke buka tanba imi mak sai defensór ba patrimóniu Estadu no defende direitu sidadaun nian, tanba dala-ruma Governu husu kona-ba kazu ruma ne’ebé identifika, ho razaun seidauk simu keixa.
Ikus nia dehan, Governu no Estadu harii instituisaun ida iha nasaun mak hein de’it keixa, la buka keixa atu rezolve no hatene nia kronolojia saida, entaun Governu la presiza harii instituisaun sira hanesan, tanba sira iha atu sai defensór ba patrimóniu Estradu no mós direitu sidadaun nian.
3,522 total views, 3 views today
Bele hare Video Seluk :
Subscribe to Timorpost
