Dili (Timor Post)—Ministériu Saúde (MS), hamutuk ho World Health Organization (WHO), realiza Workshop Nasionál ho tema “Revitalizasaun Saúde ba Família no Suporta atividade kuidadu Saúde Primária iha Area Rurais Timor-Leste”.
Diretór Jerál Prestasaun Saúde, Odete da Silva Viegas, hatete ohin ida ne’e eventu importante, ne’ebé MS halo hamutuk ho Diresaun Nasionál Saúde publika ne’ebé tutela ba iha Diresaun Nasionál Saúde, hamutuk ho Departamentu Promosaun hodi realiza atividade workshop ne’ebé foka ba papél Promotór Saúde ba família nian.
“Promotór Saúde família ne’e parte integradu ida husi prosesaun servisu ne’ebé durante ne’e Ministériu Saúde halo, hahú iha tinan 2017”, nia hateten hafoin remata serimónia workshop iha Salaun Delta Nova, Kinta (04/08).
Nia haktuir, iha tinan 2017, rejistu ona ema kuaze rihun haat (4) resin, husi Munisípiu 13, inklui Atauru ba promotór Saúde família ne’ebé identifika mai husi suku no liuhusi lider komunitaria.
“Ita hatene katak papél husi Ministériu Saúde ninian maka oinsá Implementa Programa sira hanesan moras hada’et, moras la hada’et, mal-nutrisaun, Kuidadu inan ho oan no mós Saúde Ambientál ne’ebé iha, ita implementa iha suku no munisípiu sira hotu, atu nune’e ajuda ita-nia komunidade sira bele hadomi sira nia saúde rasik”, nia hateten.
Portantu workshop ida ne’e mós atu haree mekanizmu koordenasaun entre Ministériu Saúde ho Ministériu Administrasaun Estatál nian, katak na’in ba Programa ne’e Ministériu Saúde, maibé na’in ba ema maka Ministériu Administrasaun Estatál.
Entaun papél Ministériu Administrasaun Estatál ne’e atu bele iha kometimentu hamutuk ida ba iha workshop ne’e bele sai konsensu hamutuk katak ba oin ne’e mós presiza insentiva saida maka fó ba iha promotór Saúde sira.
Nia afirma Ministériu Saúde halo inovasaun ida hodi nune’e integra servisu hot-hotu no haforsa liután servisu ne’ebé iha unidade Saúde no família, atu nune’e Saúde besik liu ba Komunidade uma-kain sira.
“Ita iha Komunidade Saúde família no mós promotór Saúde família ne’ebé ita ko’alia rihun haat (4) ital, maibé ativa menus tanba fatores determinante ho insentivu laiha supervisiona no koordenasaun regulador, entaun ita lakon iha maluk balun”, nia preokupa.
Maibé, liuhusi workshop ida ne’e ba oin tenke servisu fortifika di’ak liu, la’ós entre Ministériu Saúde no World Health Organization de’it, maibé ho Parseiru sira hotu ne’ebé iha Munisípiu hotu buka hodi haforsa iha servisu sira ne’e.
Ikus nia sita katak sira dezde tinan 2017, rihun haat (4) husi PSF sira ne’e foin treinadu maibé sira presiza maka tuir treinamentu iha tempu tuir mai atu nune’e karik situasaun saida de’it maka mosu iha rai laran sira mós iha koñesimentu natoon atu nune’e sira bele hakbesik ba iha Komunidade sira.
1,692 total views, 3 views today
