DILI (timorpost.com) – Primeiru Ministru (PM), Taur Matan Ruak, agradese ba Juventude no estudante sira ne’ebé halo manifestasaun hodi kontra Parlamentu Nasionál (PN), atu labele sosa Karreta no Laptop ba Deputadu no Deputada sira.
“Ha’u hakarak aproveita agradese ba ita-nia joven sira ne’ebé halo manifestasaun maibé ohin sira proibidu ne’e sinál di’ak, tanba ha’u preokupa tanba ita-nia oan sira ne’ebé aban-bainrua sai Prezidente, Prezidente Parlamentu no sai Primeiru Ministru, inklui sai deputadu/deputada inklui sai Governante,” hateten Taur Matan Ruak, Iha Parlamentu Nasionál, Kinta kalan (17/11).
Nia dehan, nia parte preokupa tanba liafuan sira ne’ebé sai husi estudante no joven manifestante sira-nia ibun ne’e la eduka ka bolu dehan agresaun verbal, ne’e la di’ak no la eduka.
“Tanba buat ne’ebé sai husi ita-nia ibun ne’e hatudu ita ne’e se, entaun liafuan aat mak sai signifika ita mall edukadu ka ita-nia formasaun la di’ak, entaun ita-nia joven sira labele hanesan ne’e” hateten nia.
Nia aumenta, “Ha’u uluk sei ki’ik manifestasaun sira hanesan ne’e ha’u mak halo uluk iha Dili ne’e kontra portugés sira, maibé nunka trata ema ida, maibé halo ho sivizmu no edukadu,” deklara Matan Ruak.
Tanba momentu sira kuandu tama iha trata no insulta, entaun lakon razaun tomak ka razaun atu halo manifestasaun laiha ona, entaun la presiza halo ho violénsia verbal no sira seluk tan hodi halo razaun priviléjiu la presiza ida ne’e.
“Horisehik ha’u iha Parlamentu Nasionál laran ko’alia ha’u iha informasaun la di’ak, tanba sira-nia objetivu di’ak, maibé sira lakon kontrolu ema seluk bele aproveita, kuandu ema seluk aproveita entaun risku vida ba sira nian, PNTL ninian inklui propriedade sira nian,” nia subliña.
Tanba osan laiha, maibé kuandu estraga sasán sira naturalmente tenke hola fali ka gasta fali osan, hanesan bikan karik sosa tiha ida aban baku rahun tiha bainrua nafatin tanba baku rahun tuituir.
“Ho ida ne’e ha’u agradese ba sira no enkoraja sira kontinua aprende hodi uza direitu sira ne’e mellora forte hodi hatudu ba mundu mezmu ita-nia nasaun difikuldade mais asima de tudo ita ne’e ema sivilizadu, edukadu no iha formasaun ida ne’e mak importante,” nia hakotu.
2,056 total views, 6 views today
