DILI (timorpost.com) — Vise Xefe Estadu Maiór Jenerál Forsa Armada (VXEMJFA), Majór Jenerál Calisto do Santos “Coliati”, Sesta (18/11), hala’o enkontru ho Prezidente Repúblika (PR), José Ramos Horta, ko’alia kona-ba Kaza Militár nian, iha Palásiu Prezidensiál, Bairru-Pité.
Tuir Jenerál Coliati, ohin reprezenta Xefe Estadu Maiór Jenerál Forsa Armada (XEMJFA) Tenente Jenerál Falur Rate Laek, hodi hasoru Xefe Estadu, tanba nia hala’o vizita ba iha Rejiaun Administrativu Espesiál Oekusi Ambenu (RAEOA).
Nia dehan, agora enkontru ne’e hanesan bai-bain, portantu mai halo de’it pontu de situasaun ba Xefe Estadu relasiona ho atividade Militár nian hanesan horisehik ema hotu-hotu akompaña enseramentu ba kursu Forsa Espesiais nian iha Tasi-Tolu no mós ho atividade sira seluk ne’ebé hala’o iha territóriu.
“Iha ne’e Prezidente nia mensajen ida mak ko’alia kona-ba Kaza Militár, tanba Kaza Militár dezde ke Koronél Renilde retira husi Palásiu Prezidensiál fila ba iha Kuartél Jenerál Forsa Armada nian,” nia hateten hafoin enkontru ho Xefe Estadu.
Nia dehan, pozisaun ba Kaza Militár ne’e mamuk, ne’ebé ohin iha enkontru ida ne’e, Prezidente friza kona-ba Kaza Militár.
“Portantu iha ona opiniaun husi Xefe Estadu nian no opiniaun ne’e ha’u sei lori fali ba Komandu, depois iha ne’ebá Jenerál, Komodór, ami na’in-3 tuur hamutuk para hola desizaun,” nia afirma.
Majór Jenerál ne’e realsa, enkuantu seidauk iha desizaun atu mai troka fali pozisaun iha Kaza Militár nian, portantu enkontru ida ne’e ho Prezidente, Majór Jenerál, Coliati rona Xefe Estadu nia hanoin no nia intensaun.
“Ho nune’e intensaun ne’e mak ami lori ba hodi bele tetu para foti desizaun no normalmente tenke ser Koronél, mais enkuantu Koronél laiha, bele mós Tenente Koronél,” nia informa.
Maibé, nia relata, situasaun ne’e Presidente mós hanesan Komandante Supremu nia apresia ba atividade ne’ebé Militár sira hala’o no Prezidente nia mensajen mak ida ne’e, atu Komandu mantein militár sira hanesan Militár ne’ebé dixiplinadu iha fatin hotu-hotu,” Coliati hakotu.
2,098 total views, 3 views today
Bele hare Video Seluk :