DILI (timorpost.com) — Prezidente Repúblika (PR), José Ramos Horta ho Vise Primeiru Ministru Vatikanu (V-PMV), Arcebispo Edger Pena Parra, ho parte Relijiaun sira iha Timor-Leste (TL), Segunda (19/09), halo lansamentu ba “Centro da Fraternidade Humana Timor-Leste em Para da Páz Mundial”.
Prezidente Repúblika, José Ramos Horta, hatete iha tinan 2019 simu konvite husi Papa Francisco, atu hola parte hanesan membru Painel Juri ba primeiru Fraternidade Umana ne’ebé inisia husi líder boot Papa Francisco Ahamad Al-Tayyib Gran Imam de Alazar Cairo.
“Iha misaun sira ne’ebé ha’u lori durante hanesan membru Painel dokumentu Fraternidade Umana nian, sai hanesan responsabilidade boot ida ba promove pás mundiál. Ha’u nia respeitu ba líder boot na’in rua husi Igreja Katólika no Musulmanu ne’ebé ho esforsu tomak hakarak konsolida no promove fraternidade umana ba mundu,” Xefe Estadu relata, hafoin remata seremónia lansamentu ne’e iha Palásiu Prezidensiál, Bairru-Pité.
Xefe Estadu haree ba koerensia istória Timor-Leste nian, Timoroan hotu iha responsabilidade no komprimisiu atu lori misaun ida hodi konsolida pas ida ne’e hatudu iha loron dahuluk restaurasaun indepedénsia Timor-Leste nian iha tinan 2002, iha ne’ebé estadu Timor-Leste asina no ratifika dokumentu sira ka instrumentu sira Direitus Humanus nian.
PR Horta hatutan tan, liga ho dokumentu Fraternidade Umana bainhira remata misaun iha Abudabi fila mai Timor-Leste konvoka kedas reuniaun ida ho líder Relijiaun sira iha Timor-Leste, hodi entrega kopia husi deklarasaun universál ba dokumentu Fraternidade Umana.
No molok tama ba eleisaun prezidensiál ko’alia mós HO Prezidente Parlamentu Nasionál, oinsá Timor-Leste bele ratifika dokumentu Fraternidade Umana, hodi adopta nu’udar dokumentu nasionál ne’ebé ikus mai Parlamentu Nasionál ratifika para proklama nu’udar dokumentu nasionál.
“Espera, iha sekuensia sira tuir mai bele adapta dokumentu Fraternidade Umana ba kurríkulu eskolar tuir nivél ne’ebé kada eskola iha, hahú husi nivél Ensinu Báziku ba to’o Universidade,” PR Horta dehan.
Alende ne’e mós Xefe Estadu agradese ba prejensa Vise Primeiru Ministru Vatikanu ne’ebé ohin halo lansamentu ba Sentru Fraternidade Umana Timor-Leste, no ida ne’e sai hanesan pasu dahuluk Timor-Leste nian atu implementa Fraternidade Umana.
Iha fatin hanesan, Asesor Fraternidade Umana Prezidente Repúblika Martinho Gusmão, esplika atualmente sentru Fraternidade Umana ida ne’e inisia husi Prezidensia Repúblika no harii hotu tiha ida ne’e mak foin elabora nia estatutu, hodi kontinua ba oin hamutuk ho líder Inter-relijiozu sira hotu sei haruka sira-nia reprezentante mai iha sentru ne’e, para serbisu hamutuk oinsá mak elabora Fraternidade Umana ne’e la’o ba oin.
“Fraternidade Umana iha nia asentu rua, ida husi parte Estadu no ida husi parte Relijiaun hotu-hotu nian,” Martinho afirma.
Asesor ne’e haktuir, atu integra dokumentu Fraternidade Umana ne’e ba iha kurríkulu nasionál sei haree nia posibilidade oi-oin, tanba iha kurríkulu iha buat rua importante, ida mak Intra-kurikular no ida seluk mak Extra-kurikuler.
Martinho aumenta, Prezidente Repúblika halo deklarasaun fila-fila oinsá atu integra dokumentu Fraternidade Umana ba kurríkulu nasionál, tanba ne’e ba oin Sentru Fraternidade Umana sei halo diskusaun ho relijiaun sira no Estadu, tanba sira iha eskola hodi haree oinsá halo opsaun no estudus kle’an liu tan kona-ba integrasaun dokumentu Fraternidade Umana ba kurríkulu nasionál.
2,586 total views, 3 views today
Bele hare Video Seluk :
Subscribe to Timorpost
