BAUKAU – Atividade hametin estrutura partidu KHUNTO iha baze finaliza ona, no ikus remata iha munisípiu Baukau barak liu estrutura munisípiu eleitu rekomenda no komprometidu fó limitasaun ba militante sira ne’ebé mak kontra partidu atu partisipa kongresu iha fulan oin.
Partidu KHUNTO konklui ona nia konferénsia munisipal, ne’ebé hahú iha loron 16 to’o 17 Marsu, ne’ebé loron ida hala’o konferénsia munisipal ba munisípiu 7 no remata iha Baukau.
“Husi Baukau atu hatete ba KHUNTO-Oan sira iha Timor laran tomak katak, ita nia konferensia la’o ho di’ak susesu tebes, husi Baukau atu hateten katak kuaze rekomendasaun husi munisípiu ba kongresu nasionál ne’ebé atu mai maioria hanesan, hotu-hotu rekomenda para kongresu nasionál iha fulan Abril mai sei limite tebes ba militante ne’ebé kontra partidu,” Adjuntu Sekretariu jerál partidu KHUNTO, Zeto Patricio, hateten ba Timor Post iha sede partidu KHUNTO Watulete, Domingu (17/03/2024).
Nia esplika, iha konferénsia ne’e mós konferensista sira rekomenda atu halo mudansa ka troka estrutura tuan sira, tanba ba oin partidu ne’e sei hasoru anin boot iha tempu oin mai, tanba ne’e husu ba militante partidu KHUNTO nian atu kontinua firme hodi hateke ba Timor nia futuru.
Nia dehan, normalmente iha partidu kada tinan 4 iha kongresu nasionál atu halo mudansa ba estrutura tomak no hadi’a buat hotu ne’ebé tuir konstituisaun RDTL haruka, ne’ebé mós tama ona iha estatutu partidu.
Nia hatete, kada tinan 4 halo konferénsia munisipal hili delegadu sira ba partisipa iha kongresu nasionál atu hadi’a, haree no avalia hodi halo programa no planu foun ba partidu no ba nasaun.
“Kada periodu, mudansa mundu sempre iha tanba ne’e buat ne’ebé falta, buat ne’ebé menus ita halo avaliasaun hodi hadi’a, buat ne’ebé di’ak ita defende i buka hadi’a di’ak liután planu programa ba futuru partidu no futuru nasaun nian,” nia hatutan.
Tuir nia, konferénsia munisípiu sira la’o susesu tebes, tanba ne’e hodi estrutura nia naran hato’o parabéns ba konferensista sira liuliu ba KO hala’o sesaun ho koretu ho dignu.
Iha fatin hanesan, koordenadór partidu KHUNTO re-eleitu ba periodu datolu 2016-2020 no 2024 ba 2028, Angelo Angelito Freitas Correia, responsablidade kargu koordenadór partidu ne’ebé konferensista sira fó fiar hanesan kargu todan ida, maibé fiar fó ona simu ho liman rua mas ezekuta fiar ne’ebé mak fó oinsé hadi’a di’ak liutan jestaun partidu nian.
“Durante tinan haat, ha’u’ ho ha’u nia estrutura sei hadi’a di’ak liutan jestaun ne’ebé mak iha ona hodi aprofunda liutan ami nia jestaun no polítika internal munisípiu ninian atu nune’e ami atinji,” nia dehan.
“Ami sei hala’o sosializasaun polítika no edukasaun polítika ba ami nia estrutura no militante, atu nune’e sira kumprende di’ak liutan hodi nune’e ami bele avansa ba aspeitu polítika sira seluk,” nia hatutan.
Tuir informasaun kongresu nasionál partidu KHUNTO ne’e tuir loloos realiza iha loron 23-24 fulan, Marsu maibé planu adia tiha fali ba loron 19-20 fulan Abril, tanba relasiona ho loron 23 no 24 Marsu monu iha loron semana Santa nian.
3,402 total views, 3 views today
Bele hare Video Seluk :
Subscribe to Timorpost
