Baukau(timorpost.com)—Komandu Polisia Nasionál Timor-Leste (PNTL) munisípiu Baukau hamutuk ho Komandante Eskuadra na’in-neen inklui Komandante Seksaun, konvoka reuniaun kona-ba livru Orsamentu Jerál Estadu tinan fiskál 2024.
Komandante PNTL munisípiu Baukau, Superintendente Xefe Antoninho Mauluta, hatete, hafoin simu livru orsamentál husi Komandu Jerál Polisia Nasionál Timor-Leste, iha Segunda feira foin lalais ne’e.
“Ami ko’alia kona-ba livru orsamentu komandu munisípiu Baukau nian, ne’ebé foin simu iha semana kotuk, realiza enkontru ne’e, atu esplika ba Komandante Seksaun no Sub-seksaun atu esplika liuliu orsamentu bens servisu nian kada item, atu sira hotu hatene orsamentu ne’ebé prevee ona iha livru orsamentál,” Mauluta informa ba Timor Post, iha Salaun Enkontru PNTL, Vila-Nova Baukau, Tersa (20/02).
Komandante ne’e esplika, liuhosi enkontru ne’e Komandu hakarak fó sai OJE 2024 ba Komandante Eskuadra, Seksaun no Sub-seksaun sira, nune’e iha prosesu ezekusaun sira mós hatene tuir no tempu ruma iha falla karik, sira labele duun-malu, liuliu orsamentu manutensaun, orsamentu ba Polisia Komunitaria nian.
“Ami atu esplika didi’ak manutensaun ho reparasaun ba edifísiu, tanba tinan hirak liubá kada livru orsamentu sempre tau osan manutensaun reparasaun ba edifísiu servisu, maibé agora daudauk la prevee orsamentu ba manutensaun no reparasaun”, nia esplika.
Liuhusi enkontru ne’e esplika kedas katak, husi Komandu Eskuadra hato’o pedidu mai dehan janela no odamatan sira aat, entaun Komandu PNTL munisípiu labele atende, tanba sira hatene katak orsamentu laiha.
Iha enkontru ne’e mós atu esplika kona-ba lala’ok uza Orsamentu tanba ko’alia kona-ba se-se de’it maka hetan orsamentu bazeia orden husi Komandu Jerál PNTL.
Nune’e mós esplika kona-ba orsamentu manutensaun reparasaun ba transporte, nune’e sira hotu bele hatene, atu sira utiliza transporte ho kuidadu, orienta mós parte administrasaun no lojístika atu halo identifikasaun hodi dirije proposta ba Komandu Jerál, liuliu kona-ba suplay bainhira iha situasaun emerjénsia ruma Komandu PNTL munisípiu bele uza atu halo atendimentu.
OJE 2024 Komandu PNTL munisípiu Baukau sei aloka ba item bens publika hanesan selu bee moos ho eletrisidade, sosa sasán eskritóriu komandu, kombustivel, material limpeza, manutensaun reparasaun karreta, liña telefone, sosa hahán ba detidu, servisu membru sira tuir orden no Polisia Komunitáriu.
Alokasaun orsamentu ba Polisia Komunitáriu aas tebes, tanba ne’e nia husu atu prepara didi’ak molok halo implementasaun ba orsamentu ne’e. Presiza atu forma estrutura Konsellu Polisia Suku (KPK), nune’e bele ezekuta orsamentu labele hanesan tinan kotuk la ezekuta hotu osan KPK fila ba kofre estadu.
Alokasaun Orsamentu Jerál Estadu (OJE) tinan fiskál 2024 ba Komandu Polisia Nasionál Timor-Leste (PNTL) munisípiu Baukau hamutuk rihun 134.455 USD.
2,742 total views, 3 views today
![Like](https://timorpost.com/wp-content/plugins/36/public/assets/img/reactions/like.gif)
![Love](https://timorpost.com/wp-content/plugins/36/public/assets/img/reactions/love.gif)
![Haha](https://timorpost.com/wp-content/plugins/36/public/assets/img/reactions/haha.gif)
![Wow](https://timorpost.com/wp-content/plugins/36/public/assets/img/reactions/wow.gif)
![Sad](https://timorpost.com/wp-content/plugins/36/public/assets/img/reactions/sad.gif)
![Angry](https://timorpost.com/wp-content/plugins/36/public/assets/img/reactions/angry.gif)
![Komandu PNTL Baukau Konvoka Reuniaun](https://timorpost.com/wp-content/uploads/2024/02/e96c722b-b998-43f1-8389-e9b5ea60c025.jpg)
Bele hare Video Seluk :
![loading](https://timorpost.com/wp-content/plugins/ytuples/images/gallery-page-loader.gif)
![play](https://timorpost.com/wp-content/plugins/ytuples/images/playhover.png)
![play](https://timorpost.com/wp-content/plugins/ytuples/images/playhover.png)
![play](https://timorpost.com/wp-content/plugins/ytuples/images/playhover.png)
![loading](https://timorpost.com/wp-content/plugins/ytuples/images/gallery-page-loader.gif)