DILI, (timorpost.com) — Númeru membru Unidade Patrollamentu Fronteira (UPF) ne’ebé identifikadu ona involve iha Grupu Arte Marsiál (GAM) no Grupu Arte Rituál (GAR) hamutuk 76, mak tama ona iha lista juramentu ba bandeira RDTL atu servé estadu no povu, no husik ona sira-nia involvimentu iha arte marsiál no arte rituál.
“Lista naran membru UPF ne’ebé ami identifika ona hanesan membru grupu arte marsiál no grupu arte rituál hamutuk na’in 76 ne’ebé alista ona no rekomenda ona ba gabinente Unidade Espesiál Polísia para atu halo juramentu ba bandeira RDTL hodi serví povu no estadu”, informa Komandante UPF, Superintendente Polísia, Euclides Belo, via telefone, Kuarta, (06/12).
Komandante Euclides, hatete, membru sira ne’e identifikadu envolve iha grupu arte marsiál PSHT, IKS, KORK, 77, no lista hirak ne’e komandu UEP sei kontinua lori ba Komandu Jerál PNTL atu bele partisipa iha juramentu ba bandeira RDTL.
“Bazea lista ne’ebé maka ami hatama ne’e ita nia membru sira durante ne’e envolve iha grupu arte marsiál no arte rituál hanesan PSHT, IKS, KORK no arte ritual 77”, Euclides, hatete.
Membru UPF ne’ebé invole iha arte marsiál no arte rituál mesak mane de’it, no espera katak membru hirak ne’e hafoin juramentu bele kontribui di’ak liután ba servisu ne’ebé sira halo ona hanesan ajente seguransa, no ho konsiénsia sai husi arte marsiál no arte rituál atu nune’e serví povu no nasaun ho neutru.(*)
1,090 total views, 3 views today
Bele hare Video Seluk :
Subscribe to Timorpost
