DILI (Timor Post)—Polísia Nasionál Timor-Leste (PNTL) liuhusi Unidade Patrullamentu Fronteira (UPF) Kompañia Alfa, hamutuk ho FALINTIL-Forsa Defeza Timor-Leste (F-FDTL), halo patrulla la’o ain konsege deteta karreta rua halo tranzasaun ilegál iha Maliana, Munisípiu Bobonaru ne’ebe fronteira besik kedas ho Indonézia.
Komandante UPF, Superintendente Polisia Euclides Belo, hatete nia membru konsege halo kapturasaun ba sidadaun hirak ne’ebe halo tranzasaun ilegál iha liña fronteira.
“Los dun ita-nia membru Servisu Sekreta hamutuk ho F-FDTL halo vijilánsia no identifika tranzasaun ilegál iha area Nunura no halo kedas aprensaun ba karreta rua ho marka Avanza no Carry hamutuk ho evidénsia sira mak hanesan, gazóleu 35 litru masa hamutuk 25, sigarru marka Armour Black kaixa 4 (kartolina 320 hamutuk 3200 kaixina) maka ita prende”, deklara Komandante Euclides Belo, iha nia Kuartél UPF Nu Badak, Segunda ne’e.
Nia dehan, bazeia ba informasaun ne’ebe rekolla katak sasán hirak ne’e lori tama hosi fronteira Indonézia nian.
“Oras ne’e daudaun ita entrega ona sidadaun sira hamutuk ho evidénsia ba Komandu PNTL Munisípiu Bobonaru hodi kontinua ba prosesu investigasaun no sei prosesa tuir lei ne’ebe vigor iha ita-nia nasaun”, nia hakotu.
1,636 total views, 3 views today
