MANUFAHI (Timor Post) —Segunda loron (02/08) Vice Ministru Saúde, Bonifácio Maukoli dos Reis halo lansamentu tratamentu matan ba komunidade feto no mane ne’ebé kondisaun matan katarak no seluk-seluk tan durante semana ida iha sentru saúde munisípiu Manufahi.
Iha lansamentu ne’e vise-ministru saúde Bonifácio hatete, ohin ministériu ho ekipa saúde marka prezensa iha Manufahi atu halo lansamentu ba programa konsulta matan ba komunidade sira.
“Saúde matan importante tebes-tebes tanba matan hola parte iha ita nia isin lolon, aleinde ne’e nanál, tilun maibé matan ne’e importante liu tanba matan la di’ak ita labele haree paizajen ne’ebé furak”, dehan Bonifácio liuhusi intervensaun iha sentru saúde munisípiu Manufahi, Segunda (02/08).
Nia dehan, maluk balun matan aat tanba balun mai husi jerasaun, balun moris mai matan aat kedas, balun aat tanba kauza husi moras inklui balun aat tanba vítima la dun iha.
“Tanba ne’e iha programa ida ne’ebé husu família lori labarik sira ba iha postu saúde, sentru saúde no Sentru Integradu Saúde Komunitariu (SISKA) nune’e oan sira bele hetan vítima A maibé vitamina refere tenke hetan tinan ida bad ala rua”, nia hatete.
Tuir nia katak, ho vítima A ne’ebé iha hodi prevene moras matan labele kona labarik tanba labarik mak jerasaun kontinuador maibé ba sidadaun ne’ebé katuas sempre hetan moras diabetes, loron matan no seluk-seluk mós kauza ba matan.
Tempu hanesan, reprezentante Organizasaun Mundial Saúde (OMS) mai Timor-Leste, Dr Arvind Mathur hatete, saúde matan presiza ema hotu atu serbisu hamutuk hanesan lori espesialista matan mai to’o Manufahi hodi halo tratamentu ba komunidade ninia matan.
“Atividade ida ne’e especial tebes ba komunidade, veteranus, ne’e duni husu ba sidadaun sira atu aproveita oportunidade refere hodi hakbesik aan mai saúde hodi halo tratamentu matan”, nia dehan.
Ne’e duni tenke tau prioridade ba oportunidade sira ne’e liuliu halo operasaun ba matan katarak, mutin no problema seluk tan ne’ebé ligadu ho matan ninian no programa refere OMS apoiu ona ba munisípiu 7 no mai tan Manufahi.
“OMS nafatin prontu atu koopera no kolabora iha atividade saida de’it mak Ministériu atu halo ba komunidade sira aleinde iha munisípiu Manufahi no mós ba munisípiu sira seluk iha Timor laran tomak”, nia dehan.
Iha fatin hanesan, administradór munisípiu Manufahi, Arantes Isaac Sarmento hato’o agradese wain tebes ba vise Ministériu de Saúde (MdS) ho reprezentante OMS iha Timor-Leste hodi realiza atividade konsulta matan iha Manufahi.
“Atividade ida ne’e importante tebes tanba komunidade barak liu atu hakat to’o hospital maibé dala ruma enfrenta difikuldade ekonomia no sitasaun Covid-19 prejudika atu hakat to’o iha kapital”, nia dehan.
Molok hakotu, Arantes hatete, atividade tratamentu matan lori hakbesik liu ba komunidade sira hatudu katak serbisu saúde mai ba povu ne’e duni povu mak saúde, saúde mak povu.
Tuir observasaun Timor post nota katak, partisipa iha serimónia lansamentu tratamentu matan ne’e husi komandante komandu polisia distritu Manufahi, inklui komunidade ferik ho katuas sira ne’ebé atu halo konsulta matan.(lcl)
1,179 total views, 3 views today
Bele hare Video Seluk :
Subscribe to Timorpost
